浴堂个風景畫
【文、圖∕黃美貞∕光復國小教師】
發音人：黃美貞（四縣腔）
三更半夜脈脈風砰砰滾，毋知係麼个恁大聲，睡一覺目个老弟著驚一下，在眠床項跳啊起來，「算來聲係在哪傳來个？」佢心肝肚愐毋解。阿姆哀哦！原來係浴堂壁項个缶仔必忒了，連連續續歸大片仔跌下來，滿地泥个缶仔析，像大地動過後，看著目頭就澀欸。
算來這三棟自家設計个樓仔屋，做好有二十年了，雖然外壁个石片看起來新新，毋過內肚个設備，多多少少就有問題哩，就像當多婦人家，雖然有歲數，面皮看起來無打摺，保養到像細阿姊仔，但係體力定著毋比得後生人。洗面盆、窗簾、油漆做得換新个、漆新个，整理過就加異派頭，就這補缶仔个事頭，算起來毋係難事，愛完全恢復就無恁該哩！無辦法再尋著共樣色个缶仔，無共色个貼上去乜試著怪怪、和毋著。
老弟有天生个美術天份，還細个時節，佢會自家拿油漆畫自行車，後來，自家整拖車，會用噴漆將拖車噴到靚靚，駛出去做事斯異風神哦！毋過，這擺整浴堂个問題愛仰仔來打算，係請人來補該一細搭仔，還係一抹煞換新个，小可工程無恁該請著師傅，估價一開嘴就兩三萬，人工貴合請無人。
無想著，老弟在面書同大家講：「加兩日仔會有一件偉大个作品出來！」年三十該日，佢在面書貼幾下張相片，本旦紛亂个壁，改頭換面無共樣哩！佢同好朋友利用下班个時節，將壁整理過，剷忒黏在頂高个紅毛泥，從新抹過，抹畀亮來，背尾又買幾罐仔油漆，將壁準畫布，就恁仰畫出一大片个草坪、白白个雲圍在高山崠頂，又有細細个菊花生在草坪項高，看起來異像樣。
面友當說老弟个創作，說佢恁岐嶷、恁有才情、有大師个功力！撳讚个人有三百六十零儕，老弟講：「打幫大家恁相惜，實在係鬼畫葫蘆，毋成麼个東西！」𠊎試著該就係老屋面前个風光，從細看到大，係盡天然个好光景。
