臺灣植物專家―李幸祥先生个斜槓人生(下)
【圖∕謝鎧任國立中央大學客家語文研究所碩士生∕、文∕賴維凱∕國立中央大學客家語文暨社會科學系助理教授】
發音人：賴維凱（南四縣腔）
年初四該下仔，朝晨頭打早出發去美濃尋作者李幸祥先生，小可相借問後，就開始訪問个過程，李先生正式係「知無不言、言無不盡」，其實崖等問个，佢書項都有寫，但係佢完全毋會分崖等感覺著毋耐煩，顛倒解釋啊越清楚。盡記得佢一片用客話解釋佢所知个藥用植物，久久仔就會岔出一句：「客話正式越講就越靚。」係講李先生係傳承客家文化个代表人物，一息都無爭差，這對崖一個做客話研究个人來講，自然地對心肝肚尊敬、佩服。
李先生講解植物个時節，就同講故事共樣，連第一擺陪崖去个阿爸、阿姆，第二擺載崖去个阿姊，都講出共樣共樣个話緒：「崖覺著陪人做研究會啄目睡、坐毋核，結果聽李先生講解，顛倒緊聽緊入文，緊聽緊有精神。」可見得李先生講話个聲說、內容、功力嶄完餳人聽，崖愐，對佢來講，每一種植物，在無共樣个所在，都係無共樣个故事，做學生仔係分李先生教著，上課定著毋會啄目睡。
在問著「葉下株」个時節，李先生講到一半，還䟘身去屋下脣口同「葉下珠」摘過來分崖等看真來，佢講：「這就係『葉下珠』，你看，葉仔底下有一粒一粒个珠仔，『葉下有珠』，這也係厥名仔个由來。」講著「蒼耳」，又安到「羊帶來」，做麼个安到「羊帶來」，李先生解釋：「因為佢个子有竻，羊仔經過會黏啊佢身項，故所安到『羊帶來』。」李先生講蓋多植物个安名，都係祖先生活經驗个流傳，佢蓋多謝先人个智慧。
李幸祥先生特別同「葉下珠」摘下來詳細解說
李先生每擺講著做藥仔用个植物，差毋多都會講著《本草綱目》、《神農本草經》、《中藥草祕典》這幾本書，佢毋單只佩服祖先个智慧，還蓋感謝佢等留分後代子孫恁實用个知識，崖忽然間明白吔，越至專業个人做麼个會越謙虛，因為佢懂得感謝。老實講，崖毋知李幸祥先生在兩岸到底出版吔幾多本植物專書，還做過恁多麼个風神个事，崖正知，面前這位分人尊敬又親切个李幸祥先生，厥个斜槓人生，值得崖等去了解、去學習。
