大嵙崁後生添手團
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
大嵙崁係桃園大溪个舊名，大溪在2017年變成全國第70隻客家重點發展區，雖然以前大溪个客家人分了較散，毋過這位有北台灣盡少見个詔安客家人。
客話講「添手」就係「扌帣手」，係幫助別儕做事、解決問題个意思。「後生添手團」係講一群後生人回轉故鄉扌帣手打拚。分後生人來參加客家推廣个行列，傳承客家文化。
「大嵙崁後生添手團」在2020年4月成立，主要係想在大溪做地方創生个工作。在這吂到一年个時間，佢兜已經舉辦當多當生趣个活動，像有客家樂團、在地社團精彩个表演摎市集个「後生轉來」，因為大溪永昌宮供奉神農大帝嗄來舉辦个「神農祭」，「老屋新生活運動」个客庄老屋特展。
「大嵙崁後生添手團」所在个南興里係大溪保留盡多客家元素个聚落。其中个「保甲路」係這下个南興路摎仁和路這片，永昌宮做中心點，一路有幾下間古老个老屋，像廣福詔安黃家个大瓦屋，這黃家出了五個保甲，故所這條路安到「保甲路」。添手團透過田野調查，摎在地居民共下提案討論，發現沿路有當多做得發展个所在，像「雙口呂文化廚房」，「南興社區植物染」，還有大溪當有名个社會企業，專門摎舊衫客製化改過个「寺日工作室」，佢兜為大溪提出當多社區个改造提案。
台灣客庄地區个發展、創生，其實長透會堵到無錢又無人个問題，這下在客庄看著各各个後生添手團就係客家委員會補助經費來尋後生人轉去故鄉扌帣手。有公部門補助摎後生人加入，客庄个發展就簡單加多了。像這下做了盡好个東勢、東好客庄、大湖、龍潭客庄後生添手團，其實對地方个發展盡了當大个貢獻。
這群添手團个後生人，無一定會一直在這位扌帣手，毋過扌帣手故鄉个經驗，對自家下二擺个發展，摎對土地个關心，一定有當大个幫助。
