斷捨離
【圖／李岳哲；文／賴維凱／國立中央大學客家語文暨社會科學學系助理教授】
發音人：賴維凱（南四縣腔）
恁久搬屋，對「斷捨離」這三隻字，特別有感觸！雖然這三隻字个意涵崖還毋係盡知得，毋過不時聽人講，差毋多都係同東西丟核、過簡單个生活有關，查吔一下，原來「斷捨離」看起來簡單，愛做著有息把傪樣，無恁該免！
「斷」係斷絕無需要个東西，「捨」係捨去多餘个事物，「離」係脫離對物品个執性。愛有簡單个生活，體悟這三隻字个真諦，係一生人个生活實踐。
「斷捨離」，係日本人山下英子同厥導師个瑜珈理念帶到世界各地个，佛經《中阿含經》乜提著這三隻字个重要，算來係自古以來人類追求个理想。
搬屋過程，同事同崖丟核一大波籮个書同物品，崖毋甘願，又還跍啊在資源回收室想愛拈歸來，想講「下二擺還用得著」，這下蓋後悔該「樹桌仔」、「洗衫籃」、「噴水罐仔」……係無丟核幾好仔哪！
可見得這擺搬屋，崖連這三隻字个半撇都學毋來。崖等个心，跈等年紀事，越大。雖然知捨得、捨得，「愛捨正有得」，毋過係崖等个「心」捧等仔毋盼得，「斷捨離」這三隻字愛學得來，比登天還過難。
1.丟核：音tiauˋ hedˋ；丟掉。
2.無恁該免：音moˇ anˋ goiˊ mienˊ；沒有那麼容易。同北四縣腔「無恁該」。
3.執性：音ziibˋ xin；個性固執，不肯變通。此指對物品的「執著」。
4.一大波籮：音idˋ tai poˊ loˊ；一大堆。
參考資料：
1.維基百科https://reurl.cc/nnr8a2
2.博客來閱讀生活誌https://okapi.books.com.tw/article/index/937
