平鎮八字圳風華再顯（下）
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
八字圳同伯公潭圳，經過兩百零年來，一直係宋屋庄同北勢庄蔭田盡重要个灌溉水利。五十年前，在伯公潭附近仔一眼望啊去，歸大片仔係平洋个禾田，青莠莠仔看毋盡；風圍圍等个人家，零零落落，散落在禾田中央。伯公潭還係人釣魚仔、泅水、搞尞，甚至係人採砂石仔个地方。毋過自從石門大圳開通過後，慢慢仔這幾十年來，工商發達，農業末落，工場、大樓緊起，河壩水工業污染嚴重，圳水無法度蔭田，也毋使用着八字圳个水蔭田，這八字圳同伯公潭圳嗄變到無麼个作用吔！攔水陂頭拆忒，伯公潭洋洋洋洋、波光唧爧个景致也無吔！八字圳同伯公潭圳自然就無人治理，任佢荒忒去，漸漸仔也無人管，工廠、大樓就種等上去。頭擺在這深潭釣魚仔、泅水洗身仔、搞尞个情景也毋知在哪久無忒吔！政府雖然在107年整治老街溪，毋過大家無共識，無整轉攔水陂頭，到今伸看得着河壩脣个青草、石駁，河壩肚个福壽仔，還過企到河壩石頂絡食个白鶴仔定定。（圖8）
圖8 伯公潭這下个樣貌，頂高係66快速道路，梅花布馬彩色拱橋橫踏兩岸，右片左岸係圓墩伯公，左片右岸通去福潭宮，橋下河壩肚當多福壽仔，石頭頂鳥仔企等絡食，過下來伸着伯公潭圳陂頭遺跡。（2021.01.13攝）
伯公潭圳在福潭宮右片，這下伸着水扳頭同一細截仔圳路定定（圖9、10），其他全尋毋着影跡咧！也無人去尋蹤。
圖9 吂有整治時節个伯公潭圳水汴頭遺跡（2010.12.19攝）
圖10 整治過後伯公潭圳水汴頭，圳路遺跡。（2021.01.13攝）
八字圳好得宋屋國小个林淑珍（筆名「林茵」）校長同宋屋庄宋來蘭傳下个後人宋傳敦先生煞猛發起，正有今晡日八字圳个再顯。八字圳个再顯，愛從103年宋屋國小執行「平鎮市環境教育亮點」工作講起。宋先生个屋在宋屋國小脣，本身有工程背景，林校長就請佢做顧問，審查工作計畫。經過探查、考證，出版《源遠流長老街溪》守護繪本。就因爭恁樣，探查着八字圳个水路，還有厥歷史價值。因為八字圳入水口看毋着吔！經過个路線也斷到一截一截吔！毋係分人起屋、起工場，就係佔用，嗄無法度連接，故所無法度登錄文化資產。為着愛申請保護文化資產，從104年過再問兜仔老者，查較詳細兜仔八字圳圳水个流域。後來桃園水務局「伯公潭客家信仰圈」水利工程計畫通過，宋先生正同水務局申請在工程肚融入「八字圳復舊工程」，得着同意，今晡日正看得着「八字圳个風華再顯」。
106年7月中，怪手開挖，進行整地工程。宋傳敦先生逐日朝晨5點到6點，下晝時2點到4點，都到現場，看工程進度，同時看尋得着270零年前，祖先在這開圳時有留下麼个末屑無？107年7月初2，「伯公潭客家信仰圈」工程完工，八字圳也風華再顯。109年底，伯公潭水環境工程又再完成，歸隻伯公潭呈現新个綜合景致，分大家休閒遊尞。好得宋先生無日無夜个關心、監督、紀錄，在桃園市客家事務局、平鎮觀光導覽協會个𢯭手之下，出版《伯公潭與八字圳个人文紀事》一書，同伯公潭、八字圳个人文歷史、整治經過、文化信仰這兜完全保留下來。
伯公潭水岸公園景致，八字圳這片，除忒圓墩、廣仁兩隻伯公祠以外，還有大坑缺溪面頂，新光路項當靚个三空（孔）伯公潭紅磚橋（圖11、12）；八字圳入口意象區个水岸公園門樓、公園誌、石碑；圓墩伯公祠左手析新起个梅花布馬彩色拱橋；人行道脣个梅花、櫻花，冬春之時開到鬧裁裁；還有宋先生從河壩脣扐起來堆疊个石磊藝術、碳化樹這兜。（圖13）
圖11 整治前个紅磚孔橋
（2010.12.19攝）
圖12 整治後个紅磚孔橋（經考證毋係糯米橋，（2021.01.13攝）
還愛記得，行上彩色拱橋，在拱橋頂欣賞老街溪个四片風光過後。（圖8）過再到福潭宮公園，慢慢仔觀賞園肚个小橋、流水、老樹、花草，排列頓等个老石碑林，古色古香，像人恬恬仔同你講這伯公潭个歷史故事。企到園肚，涼風沁沁，有一股思古幽情浮上心頭喔！（圖14）
圖13 宋傳敦在八字圳公園个疊石藝術，黑色个碳化樹仔（2021.01.13攝）
圖14 福潭宮脣公園肚个石碑（2021.01.13攝）
石碑年代久遠，字看毋識咧！
（本文參考林茵著《源遠流長老街溪》、宋傳敦著《伯公潭與八字圳的人文紀事》兩本書，還過愛感謝宋傳敦先生接受訪問並親身帶領筆者到伯公潭導覽講解、提供資料。（圖14、15）
圖15 筆者2020.09.07在宋傳敦先生自家店內訪問，宋先生送筆者《源遠流長老街溪》同《宋新恩公祭祀公業成立一百五十週年紀念特刊》兩本書。
圖16 宋傳敦先生(左) 2021.01.13接受訪問並親身帶領筆者(右)到伯公潭導覽講解，在八字圳公園門內入水口示意石碑前合影。
