初七七不出 初八八不歸
【文／何石松】
發音人：何石松（海陸腔）
初七七不出，初八八不歸，表面意思係講：年初七毋出門，年初八毋轉屋。事實上，這毋係恁簡單介，這係一句敬畏天地，和諧人事，家庭團員介禁忌語。禁忌，係一種飲水思源介反省，對人對事介思前想後，希望事情圓圓滿滿，所謂「有禁有忌，伶伶俐俐；無禁無忌，黃金滿地。」所以，七不出，八不歸介禁忌，毋在出不出，歸不歸，重點係在一種謹慎行事，向善感念介本心。
初七七不出，初八八不歸，這係〈陸豐新年歌〉其中介兩句，原文部分內容係「初一拜人神，初二人拜神，初三送窮鬼，初四人等神；初五神落天，初六正係年，初七七不出，初八八不歸」等等。恁快樂介新年，仰般初七七不出，初八八不歸呢？
七，係一隻吉祥數字，尤其初七，係人介生日。聽講上古時代，女媧娘娘挼黃土做人，第一日，做出一隻雞仔，第二日做出一條狗，第三日做出一條豬，第四日一條羊，第五日係牛，第六日係馬，第七日做出介係，哇！仰會恁像亻厓，該就係人，所以講係人日。
人日，就係人介生日，該就愛好好慶祝一下，人類又發現，最早來到人間介毋係人，係面前介雞犬豬羊牛馬等六種動物，亻厓俚愛謙虛介經營摎這兜動物介公共關係，人際關係，同時，又係婦女結緣日，愛準備七種羹，代表七種動物融洽共下，不分彼此介和諧關係，所謂「食了七種羹，各人做零星。」既然愛做生日，係屋下人團圓介日仔，最好在屋下，摎屋下人做伴團圓，該仰好意思出門呢？
一直到這下，還有盡多位所，年初七安到人生日、人日、人節。該晡日，全屋下人都愛在屋下，毋好出門，到暗時節，年老介阿婆愛一一喊名，齊了以後，正開始食夜，就係團圓飯，所以講「上七大過年」。
初七七不出，實在毋係毋出門，係愛大家共下尞介意思。這係因為女媧娘連續做出七種動物以後，尤其係做出人，斯像降人共樣，非常悿，愛尞一下，休養生息一下。有人講年初七係旺母節，其實係人類最早介母親節，因為，女媧，就係人類介母親，母親節係毋係最好毋出門？作當愛出門，也愛共下出門。
年初七，有兜地方在闔家團圓時節，還愛卜卦一下，卜着好天就代表吉祥，卜着係陰雨就係災害，同時，拿煎餅在禾埕一片食，一片尞，安到熏天，意思係用火來克服天漏水災，煎餅係為了補天，年初七，其實係最早介天穿日，目前廣州還有恁樣介風俗，天穿日愛尞一日，就係初七七不出介原意。
初七愛尞一日，相當這下介禮拜日，所謂「七日來復」，七日一循環，七日一禮拜，毋係外來介文化，係從古到今斯有介，係講年初七像禮拜，該年初八就像禮拜一，大家愛好好上班做事，毋好緊想愛轉愛尞，所以講初八八不歸。
從過年介角度來講，「年到初五六，無酒也無肉」，「年到初七八，家家捋粥缽」，豐湧澎湃介年就愛過忒咧，年初八斯愛在工作場所好好打拚，這就係初八八不歸介原意，不論歸不歸，一歸就有當好介收益。
也有人講，在初七食了七種羹，各人做零星以後，到初八開始做事，或者過年一直都吂轉，下擺愛轉時節，愛自家好好反省一下，對「孝悌忠信禮義廉恥」這八種道德有做正無，係無做正，該就毋好轉喔！這係個人品德，謹小慎微介基本要求，已值得參考！
可見，初七七不出，初八八不歸，不在出歸禁忌之間介對錯，佢係飲水思源，人際關係經營摎品德介自我約束，有其豐富介文化內涵。
※此處的「介」為大眾通用的「的」，同教育部訂的「个」之意
