臺灣植物專家―李幸祥先生个斜槓人生(上)
【圖∕謝鎧任國立中央大學客家語文研究所碩士生∕、文∕賴維凱∕國立中央大學客家語文暨社會科學系助理教授】
發音人：賴維凱（南四縣腔）
看等書桌項6冊《台灣藥草事典》同舊年仔正出版个《台灣傳統青草茶植物圖鑑》，想著作者李幸祥先生，這恁登真个客家鄉親，厥个斜槓人生，無分享分大家聽，實在通毋得！
年前，透過李宜諭主任，得著李幸祥先生个聯絡方式，本來想罔問一下有關植物个客家名仔、用途定，結果一查網路，不得了吔，這下正知佢係有名个藥草植物暢銷書專家。崖手一片顫，一片打電話去，驚講恁有名、恁無閒个作家，怕連愛接觸著佢本人个機會都無，吂知啊，電話該頭接啊起來个就係佢本人，崖暢啊無結無煞，講話還有息把仔結舌對碓，好得李先生親切个聲，分崖安心下來。
崖講愛訪問佢有關植物个客家名仔、用途等等，無想著佢愐都無愐，黏時就答應做得分崖等採訪，掛核電話，正知自家緊張啊連該日哪時愛訪問、愛問兜仔麼个、訪問核大家人愛共下食飯个事，聚概都添放核了了，就恁仔結束吔同李先生个通話，到今想想啊，還正式無禮貌半息。
《台灣傳統青草茶植物圖鑑》係李幸祥先生最新出版个暢銷書
還盡記得做兵該下仔，屏東所有个學校有一駁仔都愛做「校史」同「校園植物」个調查，該下仔無注意著每一個學校都會參考个《台灣校園植物》上冊(草本)、下冊(木本)，就係李幸祥先生寫个。
這恁久因緣際會，重新同這兩本書打開來，嗄發現著作者仰會恁有心，在介紹每一種植物个別名時，都會同該植物个客家名寫出來，兩擺都「有眼無珠」，毋知作者就係崖等六堆美濃个客家鄉親，下後又發現除吔《台灣校園植物》這兩本暢銷書，李先生在民國88年就開始寫《台灣藥草事典》，一直到民國92年，總共出版吔6冊，該下仔就有植物个客家名仔吔，《台灣藥草事典》還得過行政院新聞局个「金鼎獎」。一直都今，李幸祥先生係出版有關植物个書，都有客家名，正這點，就分崖佩服啊五體貼地。
講起來又乜趣妙，李幸祥先生係大眾傳播系出身个，做過記者、國中先生，還早早就通過中醫師个檢定，乜係不時得獎个文學作家，又寫過《六堆客家故事》，李先生恁仔登真个一個人，做麼个崖會毋知呢？
