細人仔煮食
【文∕黃美貞∕光復國小教師】
該日仔係好日仔，阿爸同阿姆愛去對面山个鄭屋伙房食酒，當晝就分𠊎兩姊妹來打算，阿姊額頭皺都無皺一下，牙西西仔就應好，毋識看過阿姊煮菜，毋知佢哪來个勇氣來㧡這隻擔仔，毋過，𠊎心肝肚想，無定阿姊當會煮食，早就規畫好厥个菜單了。
臨晝仔，阿姊著好阿姆个大圍身裙，頭那還戴一頂蓬白个廚師帽，就在在仔行入去灶下，雖然𠊎毋會炒菜，毋過擇菜、洗菜斯異在行，輒常跈等阿姆做，就恁樣，阿姊安排𠊎做二廚，隨時聽厥个命令。
頭下碼，阿姊拿出一張用月曆紙寫便个菜單，面頂有材料、做法同煮个時間，看起來當豐沛，應該毋多使愁會餓著。第一樣菜係煎菜脯絲卵，菜脯絲係自家晒个，鼻起來有日𤊶香，𠊎遽遽去棚頂高个醃缸扡一細扡出來浸水，浸分佢軟軟，洗三遍正切到幼幼仔，去冰箱拿三粒雞卵敲到碗公肚項，用一雙筷仔緊打，打到勻勻放在灶頭脣項。阿姊先放一細調羹仔豬油，將蘿蔔絲炒香來，正撩到碗公項同卵摝勻，再起一擺鑊，這擺个油放較多，歸碗公个卵倒落去，等到兩面煎到赤赤，再拿一隻圓盤將卵承起來，淰黃个色目實在餳人。
第二樣菜係豬肉煠盤，阿姊將該料敬過伯公个三層肉，放到電鑊仔準飯煮，水弇過豬肉，外鑊放兩杯水，等開關跳起來，再用筷仔揰看啊，無出血水就熟了，拿到桌項放涼，正來切盤搵橘醬。第三樣菜係炒玻璃菜，阿姊喊𠊎先浸兜仔蝦米，蝦米愛先噼香正放菜落去炒，阿姊特別交代菜葉仔愛一皮皮仔擘，大火遽遽炒，閕一息燒滾水，鑊蓋弇一下仔，翻加兩下仔，萋躍萋躍个玻璃菜就做得上桌了。
雖然無閒一晝邊正煮好三樣菜，毋過，係𠊎同阿姊共下打拚个成果，食起來特別扯飯，還記得該三層肉切盤，切到賁堵堵仔像磚仔；蘿蔔絲卵無放著鹽，無味無緒；玻璃菜又忒甜，恅著糖係鹽，毋過兩姊妹緊食緊笑，三盤菜全部食到淨淨見底，等到阿爸阿姆轉屋，早就撿揫好勢，兩姊妹坐到正正在該寫字，還賺著爺哀个安𧩣呢！
