洄瀾花蓮
【文、圖／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
洄瀾激起花蓮港
港口个浪花
跈等潮來潮去
轉得去个浪花
轉毋去个頭擺
幾多人上岸
開出一條過一條
滄桑艱辛个人文之路
先來後到仰般在這方
共存共榮到今下
原旦戴在這位
無定著會永久戴在這位
這下歇在這位
也無定著會定疊在這位
過去个人會做祖先
這下个人乜會過去
祖先个過去
麼人懷念
藍藍个大海
奈時包容在吾个胸懷
青青个山脈
奈時思念在妳个心肝
轉毋去个頭擺
轉得去个浪花
跈等潮來潮去
還伸著个回憶
幾靚幾深
