擘嘴擘鼻
【圖／李岳哲；文／邱一帆／國立中央大學客家語文暨社會科學學系客家研究博士班】
發音人：邱一帆（四縣腔）
朝晨頭个日頭
無經過若个同意
偷偷仔同晟人个光
照到若个屎胐
毋著，係佇毋著个光射到若个目珠
擘毋開來
若个嘴擘到大嫲隻
利利个貓齒分人看到心寒膽顫
你當像噦噦嘶嘶在該喊
好膽再射過來
好膽再射過來
無人知你做麼个恁譴
當然該脧面个日頭乜毋知
你講起當年
祖公祖婆仰般在斷烏起勢
屋頂高眠床下一哪仔
胥胥逡逡無閒在該捉老鼠
日日半夜到天光
悿到會夭壽
正有好轉竇來歇睏
毋過你講个係頭擺
正經毋係你
這下个你係主人个伴仔
無就係主人个心肝寶貝
毋係長工也毋係承勞仔
你慣勢同主人共樣夜睡
夜夜等等主人轉來
共下看一齣孤栖个電影
正肯上眠床去睡
你總係試著忒早䟘床
愁慮目睡毋足對身體毋好
該噦噦嘶嘶个形投仔
安到擘嘴擘鼻
