分享《58度鄰舍情》
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
徐貴榮先生除了用力研究客家語言之外，還煞忙筆耕，用客話寫出日常生活中个見聞、感想、看法。文字樸實，行文生動，看法淡淡中帶有哲理，結構散散中見筋見骨，使得作閒書讀，可以勵志，係講半夜恬靜時節，放啊在孤燈下，慢慢噍，慢慢欣賞，實在係一種難得个享受。一向裡來，只要佢有文章出版，𠊎都會想辦法去尋來看，無想著貴榮先生最近又有新書出版了，書名安到《58度鄰舍情》，寫佢个生活日常。
這本書總共收集三十篇散文，全部用客話書寫。可能為了大眾讀者，後背又附了華語翻譯。讀過客話以後，會感覺到華語無麼个味緒。客話書寫，基本上就係客人个人文，客人个脈絡。書係文集，故所內容繁雜，有同學聚會个記述，有對學生个懷念，還有文章講書、講親情、講感想、講鄰舍，表面上看來，包羅萬象，無主線無焦點，但係斟酌讀起來，會感覺有一種溫情，一種客人特殊个風味。比論講，貴榮筆下个姐婆，面容、動作、愛心表現，內外鬥起來，完全就係客家庄頭到位都使得看著个客人影像，這就係客家味。文學書寫，最重要个面向就係在芸芸眾生底中，能夠描繪出一幅大概共同个形樣，代表一種特殊个精神，或者樣貌。
其中分作者採用書名个「58度鄰舍情」特別精采，不單紀錄了中壢後站个歷史發展，也反映了台灣一般都市成長个過程，總係先有戇人（也可以講係先知）先來到荒涼个位所買地做屋，後來鄰舍漸漸增加，土地隨等開發程度緊來緊貴，到尾後生人感嘆地貴薪水少，只能望屋興嘆。貴榮个鄰舍來往，有相互扶持个感情，有心中彼此之間个相知相惜，某一種角度來講，也可以講係都會社區个縮影。於今生活腳步緊，大家都無閒到三更半夜，正使得入屋歇睏，鄰舍難得見面，愛坐尞啉茶打嘴鼓都非常困難了。
客話个書寫，到今為止，還係在起步階段，讀者同作者共樣都愛慢慢孰悉書寫个方式、表達个用字同用詞、結構思維个運作，文章前後个組織。但係，同其他語言共樣，客話愛邁入書寫个未來，總愛有人動手，就像社區个開發，先愛有戇人做頭前，毋驚別人个批評，也毋驚無人愛看，開路以後正有後人來拓寬、來修整、來鋪平。
聽講最好啉个咖啡，溫度在85度。金門高粱最醇个溫度係58度，同貴榮先生个鄰舍情共樣，做毋得忒熱情，也使毋得忒冷淡。讀這本《58度鄰舍情》，無論天時異寒，總係溫暖滿心肚。
