心念轉，運就轉
【文／葉金華】
11葉金華_心念轉，運就轉.aac
人生在世有時星光、有時月光，無可能事事項項都順順利利，一時堵著困難失敗毋好喪志，人生个道路盡長，毋好暫時受著打擊就唉唉嘖嘖道嘆命運、自家投降認輸。
記得舊年𠊎參加國語文競賽个時節，比賽忒在過廊看著一隻學生仔噭到目汁濫泔，吾同事企在脣項安慰佢，同事講佢係以前教過个學生仔，人異乖，國小个時節識代表學校參加語文競賽拿過第一名，上了國中乜代表學校出來比賽，毋過這擺無得名，當失望故所正噭到恁衰過。𠊎同佢分享𠊎識幾下年參加語文競賽都輸忒个經驗，「人愛人打落，火愛人點著」，𠊎試著自家能力不足、準備毋罅，嗄下來繼續打拚。逐擺个失敗經驗就像係養份，自家摎自家比，今年个表現比舊年个表現進步，就係一種勝利。失敗無要緊，跌斷腳骨顛倒勇，煞猛練習，定著有機會。
大陸電視劇《青島往事》阿姆對倈仔講：「戇牯，你愛比別儕還較認真！勤儉糧滿倉，懶尸空米缸。人坐等，你愛企等；人企等，你愛行等；人行等，你愛走等！」還細時節，無讀過幼兒園个𠊎直接入小學讀書，原旦應當讀下一屆个𠊎，項項都跈人毋著，先生講麼个，𠊎都聽毋識。吾姊在厥个班項做班長，年年當選模範生，成績打頭名。吾成績非常毋好，成績單頂高全部都係紅字，先生分𠊎个評語係「想像力豐富」，爺哀盡愁慮，佢兜想：係毋係在醫院攬毋著細人了？吾班導係正對師專畢業个後生小姐，鼓勵𠊎毋好放棄學習，佢摎注音寫在小粉牌項，逐朝晨教𠊎念讀，教𠊎寫字、抄課文，定定仔，吾成績進步了，大了還做先生喔！
今年𠊎拿著客家語演講教師組市賽第一名，當榮幸代表新北市到南投縣去比全國賽，這係𠊎以前發夢乜毋敢想个！非常感謝吾學校逐擺集訓都肯分𠊎請假、摎𠊎安排代課，分𠊎做得安心去練習。認識恁多共下學習个好伴，也係一件當幸福个事！感謝語文教練團恁多優秀个先生認真教導，𠊎試著自家資質毋係盡好，對佢兜感覺有兜仔敗勢。在比賽現場，欣賞來自全國各縣市个高手精采个表演，分𠊎眼界大開，有盡多地方值得學習。台頂三分鐘，台下十年功，看著該兜選手開容笑面上台，儀態摎動作當自然，𠊎愛多照鏡子練習正係！從細吾爸教示𠊎「笑多毋正經」，這下𠊎想愛做兜改變，學習展現笑容，因為「笑係全世界共同个語言」，做得拉近距離。
𠊎轉學校摎吾班項个學生仔分享心得，鼓勵佢兜拿出勇氣接受挑戰。麼儕講參加比賽定著愛得名？又毋係共產國家選手比賽輸忒了會變做戰犯分人捉去關起來、勞改？愛學習擔輸贏，比賽係一時个，做人係一世个，就算輸忒乜愛保持風度，下二擺再來就好，「做最萬全个準備、接受最壞个打算、享受美好个過程」就當值了！
今年𠊎雖然無福氣在國賽得名，毋過「肯問就有路，肯做就有步」，𠊎還有一年个時間做得做準備，希望明年還有機會再來參加。反省檢討，好好做改進，相信下二擺个成果會越來越好喔！
