心結同硬頸
【文、圖／彭欽清／國立政治大學退休教授】
發音人：彭欽清（四縣腔）
蘇格蘭个精神科先生詩人R.G. Laing寫已多合鬼無相同个詩，輒常用幾隻仔字過符號就點出當複雜个人際關係个問題。1971年佢出版詩集Knots（《結》），肚項有一首係恁樣寫个：
（彭欽清《心懷客家》頁64-5）
詩人用七隻簡單个字（肚項有兩隻還係人名），兩個箭頭符號，就準準个抓著頭䌈，點出人生仰會有恁多个恩恩怨怨同尷尷尬尬。詩个形式餳人看，內容又當有道理。
世間人會有恁多齬齖，輒常係有人食飽忒閒，一日到暗就想空想榫，別人一句話、一停動，總係愛去揣講係壞意个，總係想別人愛害佢。搣到自家食睡毋得，別人乜隨時愛防佢。尾項就會打逆面，起齬齖，冤家泌背。
這種揣來揣去个現像會發生在人同人之間以外，乜會發生在團體、政黨、族群、國家之間。會恁樣，主要係主事人之間毋信付，罵來罵去，手下个人又有樣學樣，罵到還較毒，最尾就變到毋係𠊎生就係你死。古今中外就共樣，這就係到這下歸隻世界做麼个還係繷交交仔。
個人過團體會有恁仔揣來揣去个心理主要係「𠊎正著」个觀念，麼个事情就認為自家最著、盡好，別人都同「𠊎」比毋得。這種自我中心个結果就係愛逐儕都照吾意思去做，無就看「𠊎」斜斜，挑試同「𠊎」結冤仇。發展到最尾就變到「順我者昌，逆我者亡」个地步，認為自家係正義个化身，所有逆𠊎个都係壞心人，定著愛同佢除忒去。恁執性个樣相毋係同客話講个硬頸共樣共樣。
拿這擺米國總統大選來講，川普个共和黨同拜登个民主黨，都同對方品相到無一垤好，候選人總係嘎狗相咬，支持个人就像石頭狗樣仔，擎錘擎棍相打泌背。在臺灣，藍綠兩片析个人馬鬥起來乜共樣。藍个講綠个係貪心惡毒个，綠个講藍个係惡毒貪心个。其實，狐狸莫笑貓。藍綠平平就半斤八兩，騙人騙神騙鬼，就係為著愛抓權抓錢。
愛化解心結，頭下碼愛做个就係毋好硬頸，第二係愛知心結係仰仔打个，領導人个心結解毋開，䌈死个係平民百姓。
吾姆半隻字就毋識，在生教𠊎兄弟姊妹講愛有量正有福。大體政治人物毋係博士乜係碩士，總係想權想錢，無个量講好好仔坐下來，為國家百姓設想，正經係書讀到屎胐壢去誒。
