日日田職物所
【文、圖∕薛常威∕國立中央大學客家語文暨社會科學學系在職專班碩士】
發音人：薛常威（四縣腔）
桃園大溪个客家人在2017年个統計，已經超過三分之一，算將乜係客家文化重點發展區，佢兜大體係在福建漳州徙過來个，對大溪个發展有當大个貢獻，特別大溪个南興社區，客家人口超過三分之二，其中个黃姓人家，這下還當會講詔安客話。
在這北部罕得講詔安客話个社區，永昌宮係居民个信仰中心，廟埕大榕樹下个一間老屋，一群大溪返鄉个後生人在這開了這間「日日田職物所」。日日係每一日个意思，兩隻日合起來就係「田」，職物所代表「職人造物」。主持人高慶榮本來係學設計个，當好老个東西，以前个作品乜摎廢棄工廠、閒置空間有關，佢感覺當好運，做得參加「大溪木藝術生態博物館」个翻轉，還過摎好朋友進行「三手微市集」、「新南12文創實驗商行」等老空間再造計畫，分佢在大溪做得累積能量，最尾正做得還轉家鄉成立工作室，串連博物館、宮廟、社區摎後生人這4項資源，團結還較多个能量，來分人看得著。
永昌宮廟埕就係高慶榮細个時間搞个所在，看到150零年个大榕樹，斯想著宮崎駿个動畫《龍貓》，佢當希望有一間當生趣个空間來工作。經過廟方个協助，本來放農具、雜物个倉庫，這下轉型變成一間文創設計公司，高慶榮希望有心个後生人在這位開始行入農村。大溪，毋單淨老街摎豆干定定，南興个田地當闊，係桃園个大穀倉，乾隆年間開始个永昌宮乜有270零年个歷史，另外像仁和宮係全臺灣第一間開漳聖王廟，高慶榮希望發現在地个歷史文化，喚醒在地人對地方个認同。
「日日田職物所」已經渡等十過個後生人返鄉創業，除忒推廣在地農業文化， 創意團隊還設計桌遊，摎大溪宮廟、景點融入遊戲地圖，分旅人緊尞緊學。永昌宮奉祀神農大帝，透過田野調查採集神農嘗百草、耕種、用火知識，推出「青草學堂」，帶領大家栽種藥草，分地方記憶毋會斷忒，傳統毋會毋見忒。
大溪豐富个內涵盡多，「日日田職物所」這群後生人，用聚落个概念串連大溪个工藝、文化資源，用翻起个老屋，分現代文化創意个精神緊來緊大，打開大溪个文化大門。
