平鎮八字圳風華再顯（上）
【文、圖∕徐貴榮∕國立中央大學客家語文暨社會科學學系兼任助理教授】
發音人：徐貴榮（四縣腔）
有關平鎮宋屋庄个開發，本人識在本刊297期（2018.3.15出刊）刊過「平鎮宋屋」一文，肚項有提着嘉應州客人宋來高在清朝乾隆9（1744）年開墾安平鎮、宋屋庄一搭仔，並創建八字圳蔭田，擴大開墾範圍，增加農業生產。
當時，宋來高帶等兄弟仔、姪仔這兜來到這搭仔，看着南勢溪同大坑缺溪相合个地方（圖1），水深像潭，四片當闊，就在這開始順等河壩流往下个左片開墾，取「來自廣東、興盛家族」个意思，安名「廣興庄」，後來宋屋人多，慢慢仔正分出「宋屋庄」。因爭在大坑缺溪同南勢溪匯合个左片有隻安平鎮水尾伯公（平鎮里圓墩伯公），較下兜成百米仔又有一隻廣興庄水頭伯公（廣仁里廣仁宮），右片有一座大北勢開庄伯公（新貴里福潭宮）。故所，這深潭就安到「伯公潭」。
圖1 南勢溪同大坑缺溪相合个地方，老街溪在右片流往下。（2021.01.13攝）
為着愛灌溉蔭田，就在伯公潭大坑缺溪左手析結起攔水陂頭，開一條八字圳引水蔭田。過後大北勢庄王、徐、戴、邱這兜大姓，也在較下兜仔个老街溪右片析結起四米零高个攔水陂頭，開一條伯公潭圳，蔭歸大片仔大北勢庄个田。故所後來个伯公潭，八字圳陂頭个安到上潭，一直透到大庄伯公附近仔；伯公潭圳陂頭个安到下潭，跈南勢溪上去，一直透到王屋。上下兩潭相連，歸大片仔水面洋洋洋洋。
八字圳先經過「葉屋段」，大約900米，頭截因爭地勢高岡，無法度蔭水，主要係大湳塘來个水，宋來高个老屋（圖2）同風水（圖3），也在這段北片，到今還完在。
圖2 來臺祖宋來高傳下个老屋
圖3 來臺祖宋來高个風水
後來田較低湖兜仔，圳水正開始蔭田，葉屋个田係八字圳第一個灌溉區。過忒葉屋、鐵路到廣仁公園脣个菜園分出東圳。東圳經過東周鐵工廠，向東穿過石門大圳、環南路、臺灣銀行、跈老街溪直行到秉坤婦幼醫院，在延平路（縱貫公路）二段107巷尾个地方落陂塘，流轉老街溪，大約1500米，灌溉這下延平路二段東片一大片个田園。
主圳西圳再經過水頭屋段，到阿沐餐廳（原茂園餐廳）停車場下背分出窯圳。因為頭擺廣仁公園到環南路長江加油站一搭仔係磚窯廠，故所安到窯圳。窯圳過石門大圳差毋多30米，左轉穿過延平路二段，又右斡過環南路，順等延平路北片店仔後背，一直到義興國小、陽明醫院，再跈義民路店仔背，到陸光六村圍牆下接舊社大圳，總長大約1800米。這下个賓士汽車、石門水利會，直到義民路這兜田地个田水，全靠這條窯圳灌溉。這條窯圳，到目前也係八字圳保留最完整个一段。
西圳在阿沐餐廳過後，向北穿過延平路378號个菜園，進入430巷81弄居易新村脣邊，穿出聯新國際醫院中堂頭前。大湳塘个水也流到急診室頭前這搭仔，形成一隻大水汴頭，水流像細水沖樣仔灌落大約1米深个西圳。後來繼續經過義民廟圍牆面前，穿過石門大圳、環南路、育達高中、廣達街，盡尾到廣平街接舊社大圳，大約長3000米，蔭居易新村、聯新國際醫院、平興國中、直到廣興庄个這兜田。
八字圳總長度超過7000米，蔭田面積百過甲，當時並無同人收水錢，也無收租金，淨就組管理委員會共同管理圳路，宋屋開發人造福當地耕田人，實在係一件了不起个事情。大家也會試着當奇怪？當時仰會安到八字圳呢？因爭八字圳本圳分出東圳，圳道分支像八字；西圳分出窯圳，圳道分支也像八字，故所正安到「八字圳」。（圖4）
圖4 八字圳圳道同老街溪、大路、鐵路、灌溉區相關圖（宋傳敦先生提供）
大家可能還會較想毋着个係，從圓墩伯公前，燥爽个沙地底下挖出个碳化樹仔當大頭來看，270年前，伯公潭一搭仔滿哪仔就係大樹揬天，八字圳做攔水陂頭堵水該兩時，盡先也係倒伯公潭脣个大樹仔來做个（圖5）。後來愛蔭个田緊來緊闊，水愛緊來緊多，正在較下兩米邊仔，取在地砂石仔，攪紅毛泥、結大石頭，做隻4米零高个攔水陂頭，蔭較闊个田。（圖6）
圖5 宋先生同碳化樹（木）種到公園項。（2021.01.13攝）
圖6 石跳仔係後來个石頭攔水陂頭所在，石跳仔上去个石駁中央長方形係打忒个陂頭遺跡。（2021.01.13攝）
果然毋會差，為着這擺「伯公潭客家信仰圈」水利工程，旱瀲水過後，當初个頓水陂頭大樹伸着河壩底个截正浮出來。（圖6），毋過，一下無注意着，八字圳个入水口，在結石駁个時節，嗄分工程人員封忒吔，係非常打爽个事情。
圖7 盡先攔水陂頭个樹頭（宋傳敦先生提供）
