牆角讓三尺 大家親暱暱
【文／何石松】
發音人：何石松（海陸腔）
牆角讓三尺，大家親暱暱，係講隔壁鄰舍，知得互相謙讓，多替對方設想，起屋時節，能夠在隔界介位所退讓三尺，展現仁者介誠心，智者介遠見，係社會和諧介基礎，精神世界介一色青天，開眉笑眼介退讓，結果感動對方，對方也讓三尺，深深感受著「六根清淨方為道，退步原來係向前」介道理。正經係退一步，天闊地闊；讓三尺，大家親暱暱。
聽講三百零年前，安徽桐城，有兩戶大家下人，一家姓張，在京城做宰相；一家姓吳，係有名介徽商，生理通天下，一半桐城介財產都係佢兜介，所以安到吳半城。因為吳家人在屋後背結牆起屋，佔了張家介三尺土地，兩家人就吵了起來，吵到當合，斯像井肚撐船──難開交共樣，各不相讓，連縣長也手扡扡仔，無辦法解決，毋知仰結煞正好。
張家人想來想去，硬硬想到「鈍刀破竹，仰般都想毋開」，突然想著來寫一封信仔去京城，想愛請做宰相介張英來解決。張英接著信仔以後，就想著明朝楊翥介〈讓牆詩〉：「餘地無多莫較量，一條分做兩家牆；普天之下皆王土，再過些仔也無妨。」就回信轉去，也係四句話，該就係：「一紙書來只為牆，讓佢三尺又何妨；萬里長城今猶在，不見當年秦始皇。」張家子姪接著信仔以後，就將圍牆退後三尺。吳家人看著感覺奇怪，佢毋單淨毋爭，顛倒退三尺，嗄試著當敗勢，也退後三尺，斯變到六尺。又向對方會失禮，兩家人有講有笑，親暱暱仔。這就係「六尺巷」介由來
退讓三尺，毋係弱者介軟弱，係強者介包容。佢所發揮出介能量倒轉係千尺萬丈，斯因為包容退讓介心胸，使張英能夠「宰相肚裡好撐船」摎「無度不丈夫」介器量，佢能夠對鄰舍退讓，也能對天下人謙讓，使著大家親暱暱仔。聽講，有一擺佢轉老屋掛紙，路上堵著檢樵介人，笑微微仔特別退讓分佢先行。該鄉下毋熟似介人受著感動，也親暱暱仔請佢先行。
等了不起介係，張英介徠仔張廷玉對功名介退讓。有一日，雍正皇帝看著錄取舉子介文章當好，但係，嗄排在第五名，皇帝認為應該排在第三名介探花。等到撤封時節，正知原來這隻考生就係張廷玉介徠仔啊，皇帝當暢，馬上派人摎張廷玉講。無想著張廷玉嗄請皇帝一定愛摎佢退轉第五名，皇帝感覺奇怪。張廷玉講：「國家考試，三年正一擺，考生歸萬儕，𠊎全家人都在朝廷有當好介職位，仰好又占貧寒子弟介名額呢？」這一讓，歸天下人都感動，試著親暱暱仔。
張廷玉共樣官居宰相，還做了47年之久，經過三朝皇帝，係清朝唯一一個漢族大臣奉祀到太廟介。可見，讓三尺介世界，係仰般大又闊啊！從此以後，恁樣介好家風繼續影響下去，子弟親暱暱仔互相勉勵打拚，各有成就，造成了父子雙宰相，三世得諡號，五朝金榜題名，六代相續為翰林等，一門七代十三進士介榮景。
做官先做人，做人先修身；修身先謙讓，謙讓愛有量。有量正有福，有量正可以做大生理，所以講「吂做生理，先學謙讓」。吳家係有名介大商人，也體會著「無尖不成商」讓利分人介道理，意思係講做生理介人賣米穀分人，米籮愛張淰淰椎椎，秤東西愛有秤頭，正係會做生理介人，係正經介「無尖不成商」，難怪佢生理做著恁大，總感覺著親暱暱仔。
牆角讓三尺，大家親暱暱，莫小看這短短介三尺，嗄可以讓出天寬地闊，朗朗青天介和諧世界，張吳兩家介仁智退讓，斯係當好介模範。毋單淨摎鄰舍親暱暱，摎皇帝親暱暱，子孫親暱暱，摎天下人親暱暱，大家親暱暱。
※此處的「介」為大眾通用的「的」，同教育部訂的「个」之意
