閩粵贛「儺戲」──覡公請伯公（儺祭）
【文、圖∕梁萩香∕國立中央大學客家語文暨社會科學學系客家研究博士班】
發音人：梁萩香（四縣腔）
這兩年去大陸田野調查「伯公」（土地公）同臺灣个伯公有相同無？係同源無？看著異多生趣个畫面，比論講食酒辦桌先「噭嫁」（哭嫁）、「石狗王公」（狗頭人身土地公）毋係臺灣看著个福德正神、「覡公唸經請伯公出來」（儺祭）……，尤其儺祭个跳儺，當像在臺灣哪看過，毋過又想毋起？
「儺祭」又安到儺儀、儺舞、儺戲、巫儺戲、儺壇戲、謝神戲、伯公戲，較早期係四儕、五儕跳儺，戴等面殼，得人驚个面殼比靚靚个面殼多，較有錢个人家會請到八儕，較無錢个人家也有請著兩儕來，最少兩儕做得扌帣手，佢兜愛唸經緊行緊跳，這儺祭做得「送煞鎮邪」（驅鬼）。
舊年訪問大陸朋友（閩東南永春縣一都鎮—唱山歌、打拳頭當出名）个親戚、鄰舍，佢兜歇山肚，自家種菜同果子、畜豬牛羊雞鴨，一年下山無幾多擺，生活當單純，相信「覡公跳儺」做得迎神、接福，請伯公保護歸村所有人平安順序。幸運親目珠看著覡公跳儺請伯公，因為該位个覡公無多咧，逐莊逐村都有需要，故所正請著一儕定定，覡公唸經个內容做得「隨口隨鬥」。
受訪个村長講，聽厥公太講山肚生活苦，見擺跳儺過後就有好事發生，故所，定著愛傳承下去。村長還細時節聽老人家講古，講以前係驚該王公（首領）遇刺，隨從日日愛有幾下儕打扮同王公共樣，全部戴面殼，出門排列仔也愛日日換位行，主要係保護王公。王公惜厥子民，長透愛出門查訪生活情形，後來，受著照顧个百姓開始會拜託王公食佢兜誠心準備个茶水、米糰、粄仔，甚至放長桌、長凳在路脣，準備个餐點越來越多，正會演變成後來个「祭品敬神」，相信神明食過个正有神力加持。
（覡公請伯公的儺儀）
吾姐公得過義民爺祭典「神豬比賽」个金牌當多面，記得逐家个大豬公都愛載到廟前，廟前「cai11棚」（搭戲棚架），有「客家採茶戲」同「客家山歌」表演（在劉還月2001《臺灣客家族群史‧移墾篇》下冊106頁，也有當相像个客家莊調查內容），戲棚下老嫩大細比比坐，大家看戲看到牙絲絲仔。
其實「客家採茶戲」就係「覡公跳儺」、「儺戲」、「儺壇戲」、「cai11壇戲」个演變。在教育部臺灣閩南語常用詞辭典做得查著「〝立在〞cai22」，華語意思有「豎立」、「僵立」，比論豎立柱子「cai22柱仔」，比論佢呆呆僵立「cai22佇遐」。臺灣閩南語另外有「祀cai22、祀sai22」，比論設立神佛或祖先牌位「祀公媽」。
臺灣客家語常用詞辭典查毋到擺放或設立神壇「〝立在〞、祀」兩字，雖然有「祀」字，毋過「祀」客語無cai11、cai22、sai22音，做得查著「裁」較相像，「裁桌cai11 zok2」（將桌子擺放妥當）。
教育部全國語文競賽个客家語朗讀、客家藝文競賽口說藝術類，輒常會聽著、看著「古琢古琢真古琢，做好事，擎凳桌，張伯姆〜好手腳，火一著就喊裁桌……」，這段「客家親屬俗諺」當多客家人都會唸，吾个客語薪傳班也識教學生仔打棚頭唸這段俗諺（註1）。
頭前提著「裁桌cai11 zok2」（將桌子擺放妥當）。「裁」蟹攝開口一等精組從母字，全濁聲母，共樣這組字在贛西北「宜春客家話」有類似coi113、cai24、sai24。「祀」止攝開口三等精組邪母字，全濁聲母，共樣這組字在贛西北「萬載客家話、宜春客家話」都係唸sii53（讀如華語「士」）。萬載還保存傳統儺戲、儺祭，用佢萬載客家話隨口隨鬥唸經跳儺。在羅肇錦2000《臺灣客家族群史‧語言篇》168頁-181頁，客家話同贛、閩、粵个關係，用當多精、莊、知、章組个字去比較，當清楚看出客家話、閩南話、廣東話同贛語都有相互影響著。閩西客、漳州客同閩南話較接近，惠州客、梅州客同廣東話較接近，語音接觸後，跈等時代變化，緊變緊多，尤其現下交通恁利便，哪就有高速公路，就同時代進步个速度恁遽，語音、風俗、文化也演變盡遽，正會保護王公（伯公、神明）變做敬伯公，正會王公出巡過程變做儺祭、儺舞、儺戲，再過跈等時代緊行、緊變，儺戲、「cai11壇戲」變做現代客家莊个「客家採茶戲」。
註1：在鄧榮坤1999《生趣客家話》43頁，胡萬川2005《楊梅鎮客語諺語謎語(一)》115頁，黃永達2006《客家諺語漫畫：諷世類》200頁，劉泰祥2009《撬冬--客家七字諺語─第二輯》151頁，徐瑞琴2011論文《客家親屬相關俗諺之研究》131頁……，都有相同个內容摎說明。
