六歲个阿和牯
【文∕邱鴻春／中央大學機械工程學系碩士】
六歲个阿和牯戴在莊下，係戴架桁仔矺瓦个泥磚屋，屋下有阿爸、阿姆、還過阿婆，總下四儕人，厥爸摎厥姆兩儕全在外背做零工，厥爸盡老實毋會摎人加話，有點仔驚餔娘，厥姆斯較猴、脾氣乜毋好，兩儕出門做事，愛到暗正會轉來屋下，共下食夜，厥婆斯在屋下種菜、畜頭牲還過渡佢，生活雖然過到有點仔苦，毋過，大自家全當惜佢。
有一日，食夜个時節，堵堵落大水，厥姆摎見擺共樣，拿該隻缺嘴碗公裝一點仔飯，挾一點仔無油無臘个青菜分厥家娘，喊佢兜到脣頭矮凳仔坐等食，無一下斯食忒咧，厥姆摎佢个碗公接過來，在桌頂擲當重講，歸日在屋下無做麼个，恁會食，一下食淨淨。
馬上，阿和牯斯驚到緊噭，噭濫食淚摎厥姆講，阿姆，你這隻缺嘴碗公，毋好擲恁重，毋好打爛忒哦，愛摎佢收好來，厥姆看著，仰恁奇怪，做麼个喊亻厓愛摎這隻爛碗公收好，斯問阿和牯，這隻爛碗公你愛做麼个，做麼喊亻厓愛收好，毋好打爛忒，阿和牯講，這隻碗係阿婆食个，亻厓愛留起來，下二擺等你老咧，亻厓斯做得拿來裝飯分你食。
厥姆聽著，著驚下，馬上反精神起來，遽遽牽厥家娘來大桌坐，還摎佢會失禮講，阿姆，亻厓毋著咧，請你原諒亻厓，這下開始，亻厓會做一隻好心臼來有孝你，一定毋會對你恁鄉暈咧，厥爸這下講話咧，猴嫲，總算你想通咧，希望你今晡日講个話愛做著，毋好分阿和牯摎阿姆來失望。
阿婆看一下外背，指等屋簷下開嘴講，你兜大自家看，外背个屋簷水點點對，全毋會爭差，細人仔毋知頭天，會講出恁樣个話來，完全係亻厓俚世大人做出來，分細人學个，尤其係，這下細人仔，逐儕精呱呱，有樣看樣，無樣自家會變樣。
世大人自家無做正，愛要求細人仔，做這做該，佢正毋會插你，到尾來正知，屋簷水點點對，無半點耗漦。
阿婆好得有阿和牯這隻乖孫仔，心肝寶貝，今晡日開始，亻厓俚一定會開始行好運咧，包尾，阿和牯慢慢仔大咧，讀書當識，直直讀着臺大畢業，乜有當好个頭路，賺錢轉來老屋淋樓仔，分阿婆、阿爸、阿姆戴，毋會像頭擺見落水，滿哪仔濫湫湫，屋肚濕溚溚个情形，從今以後，一家人戴在新屋，過著和挼幸福个日仔。
