雞塒脣个時計果
【文、圖∕黃美貞∕臺北市光復國小教師】
發音人：黃美貞（四縣腔）
雞塒脣个瓠棚，種有纜纜吊吊个時計果，一來有無農藥个果子好食，二來又做得分雞鴨抵日頭，老古人講：「屙屎扡鹹菜」，一息就毋會爭差。
時計果係日本時代傳來臺灣个，因為佢打个花看起來當像時鐘仔，還有長長短短个花芯，就像長針短針，日本漢字就喊做「時計」，故所在臺灣个客人、學老人同原住民全部就講tokeso，係用日本話來發音。大體仔來講，一頭時計果當欸過三年，係講愛年年有好收成，就愛年年種新个秧，比起種瓠藤菜，一季就過時，還係較有價值。
對大哥來講，種時計果還係惜餔娘个一種表現。大哥大嫂結公婆三十年，共下打拚拖車个事業，公不離婆，秤不離砣，煞猛打拚，無日無夜，總算兩個倈仔大學出業，有穩定个頭路，肩頭个擔仔也輕加一半較加，人講：舌嫲牙齒恁好乜會相咬，雖然雜嘴冤家毋識停，毋過，好得有阿嫂來理家管帳，看顧大細，正有今晡日个好光景，事業家庭都異順序。
現下阿哥个休閒生活就係種菜種果子，時計果係阿嫂從細到大，最好食个果子，故所阿哥䟓工去南投買盡好个種苗，細心細意種在雞塒脣，還特別用一个網仔箍起來，從递藤到結果，像照顧細人仔樣仔，日日就去巡看那，有較靚無？又打加幾多粒時計果？按算哪久做得摘？亻厓胚想，阿嫂食著第一粒時計果該下，定著會當感動。
轉妹家个時節，阿哥特別帶恁多姊妹去遶山花，第一站就係去看時計果，青里里个果子像大粒个乳珠仔，在日頭下特別打眼，大家說到奈毋得，還注文愛幾粒仔嘗啊！亻厓偷偷仔看一下阿嫂个面，兩粒目珠早都笑到變一條線咧！
