轉擺
【文、圖∕徐佳妤∕臺北市國小客語支援教師】
發音人：徐佳妤（南四縣腔）
你，定著會笑亻厓戇。
舊年个年初三，一儕人坐火車，擐等行裝，對松山來到鳳林做志工。一下車，落雨又冷咻咻，一路項，淨亻厓，行吔半點鐘，汗流脈落，顛倒毋會寒吔。
來到民宿，就跈等工作人員剝、裝被單同枕頭布、洗杯仔、刮玻璃門个水痕、吸塵灰、拖地泥、䌈地圾、補充衛生紙同洗髮精，拚掃好間房，還愛入灶下𢯭手準備人客愛食个、洗菜、洗碗筷、抺桌仔，無閒洎杈到「屎朏毋識坐燒」。服務過程中，亻厓認識其他个志工，大家分享自家个生命故事，聽啊聽吔，心肝頭會著驚一下，試著別人就係亻厓个一面鏡仔，蓋像看著弄擺个自家，有人講：「你就係亻厓，亻厓就係你，眾生係一體个。」今嘎，到這下正了解這句話个意義。
民宿外背係一大片个園區，做得去遶遶啊。行啊行吔，看著一個水管必了一細空，水，當有力个洩出來，這洩出來个聲，像在該唱歌仔。在水管脣口，無幾遠个所在，一隻蟾蜍庰在落葉仔裡背，一時興頭，拿起手機仔錄影，無想著，佢怕係驚人捉，一𥍉目，共快跳走吔！實在盡生趣。又看著一頭倒下來个臺灣欒樹，聚總蓋多隻紅姬緣臭鼻蟲，紅紅細細隻个蟲仔爬來爬去，蓋得人驚！雖然，有兜个蟲仔實在得人惱，毋過對亻厓來講，所有萬物都有佢存在个價值。
在這，做得放慢腳步，欣賞造物主送分亻厓等个等路：開到大大蕊个杜鵑花、聖誕紅、燈籠花、花炮花......仰，會生到恁鬧呢？在這，聽得著鳥仔每日喊你䟘床；在這，淨愛用「心」去感受，就會看著生命个活跳。人生，有晴、有雨、有苦、有樂，若係心情慍慍悴悴个時節，來花蓮轉擺一下，大大口去吸收大自然淰淰个力量，蓋像，就有了行下去个勇氣。
這下，你，還會笑亻厓戇無？
攝於花蓮鳯林鳯凰路項个花炮花（華語：煙火花）
