吾婆䌈粽仔
【文／張捷明】
𠊎想，吾婆怕盡好食焿粽 ，吂到五月節，佢就怙等 怙杖仔 ，在灶下行上行下緊問阿姆：「粽葉啊，粽葉摘便吂？還有粽擐索，粽擐索挼好吂？過矣焿油 呢？𠊎仰無看著焿油？」
這兜問話𠊎早就會背矣，因爭阿婆一日愛問三遍，又好得阿姆好性體，總係低言細語應阿婆：「有準備啦！粽葉自家个麻竹園便便有，愛用著正摘較萋，粽擐索阿明厥爸打好咧，焿油對門店仔有，做汝放心。」
𠊎問阿姆，仰無愛先去市場買幾隻粽仔分阿婆食過癮諾？
阿姆應𠊎：「阿婆毋係為著愛食粽仔正䌈粽仔，佢係驚裡過節，毋記得䌈粽仔啦！」
「該汝摎阿爸係毋係記才毋好？仰阿婆愛日日就三叮嚀四囑咐？」
「戇倈仔正得，這就安著『家無噥噥公項項空，家無噥噥婆項項無』啦。」
到矣 五月節前兩日，阿爸就去麻竹園摘粽葉，𠊎問阿爸，粽葉去市場買就好，仰愛自家摘？阿爸講：「阿婆教愛省儉，自家有就毋使買。」
𠊎又問阿爸，滿山竹園有竹葉，做麼个算定愛用麻竹葉？
阿爸講：「戇倈仔正得，又毋係細人仔搞家啦飯仔，麻竹葉大大皮正䌈有好食。」
粽葉摘好咧，𠊎𢯭手洗粽葉，阿姆摎焿油攪到先洗便个糯米肚，攪到黃黃，就開始䌈粽仔，阿婆乜來𢯭手。
阿姆拿起兩皮粽葉，頭尾相反疊共下再對拗，再舀一杓糯米放落去再包起來，䌈好粽擐索就完成一隻四隻角个粽仔。𠊎乜𢯭手學做，毋過仰會扁扁伸兩隻角，阿婆就當有耐心个教𠊎，正漸漸有粽仔型。
粽仔總算䌈好，阿姆開始煠 粽仔，𠊎𢯭手燒火，差毋多成點鐘就好矣，打開鑊蓋——竹葉香、米香，做盡噴噴香，阿爸擎筷仔槧 入粽擐耳將粽擐擐起來，阿婆講焿粽愛放畀冷正做得食。阿婆還做一條令仔分𠊎揣 ：「四角四面無四方，綾羅腰帶繫中央，挷挷拖拖跳落水，去到衙門脫衣裳。」
啊！請問，汝揣矣著 這係麼个無？
