門關到密密,恁仰寫著麼?
【文/范文芳/國立清華大學中國語文學系退休教授】
發音人:范文芳(海陸腔)
一 、先從字音來討論
客語習慣講門關密密,嘴合密密,實際發音係{mi mi}陰平調,但係查看中古音,廣韻標美筆切,應該係入聲音{mit},客語講祕密、密切,就保留入聲音{mit/met},故所客話講門關密密,會係用毋著字無?續下來,吾等就來詳查幾隻音義相近个漢字,再過比較其字義、構詞、習慣講法,正有可能尋著比較合理个用字。
1. 密,美筆切,入聲,聲母係明,客語發音應該係{mit/met}。
2. 閉,博計切,去聲,聲母係幫,客語發音應該係{bi}。
3. 彌,武移切,平聲,聲母係明,客語發音應該係{mi}。
4. 靡,文彼切,上聲,聲母係明,客語發音應該係{mi}。
從字音來看,密、靡、彌都做得符合客語个語音,但係彌、靡兩字意不合。
二 、 續下來討論字形摎字意个相關問題
1. 密,从山从宓,宓也兼表音,說文謂宓,安也,其後字義延伸,稠密、密閉、嚴密、密室等等,故所將窗門關到密密,密字形、音、意都符合。
2. 靡,字形从非从麻,說文解為披靡也,本意為散亂倒下,並無緊密之意。
3. 彌,古文从弓从寅,會意字,意指放鬆弓弦,篆字改為从弓从爾,字義演化為長久、廣大、充滿、彌補等意,阿形看來,彌字並無緊密个意思。
4. 閉,古文門內有木拴,篆文簡化為才,說文解為闔門,字義演化有關閉、堵塞、停止等意,字義接近,字音不合。
三、借用比較語言个方法來增加理論根據
1. 客語講將門關到密密。
2. 華語說把門關得緊緊。
3. 英文close,當動詞用係關閉、靠近。當形容詞,有接近的、緊密的意思。
四 、結論
經過字音、字形、構詞、語法以及比較語言个討論,台灣客語講【將門關到密密】,密密,係疊音詞,做為副詞性補助語,強調關門个密合程度。
講著密字个字音,古音本係入聲,客語今有兩音{mit/met}{mi},客語也有部份入聲音脫落个現象。