歸肚笥都係屎以後
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
客話愛行上文字化，有蓋多需要思考个所在。本來教育部客語常用詞辭典進行編輯以前，有列一張愛遵守个規則。第一點就係盡量同各腔調个聲母、韻母、聲調愛配合。毋過前幾日在「肚子」个用字討論中，已經失去了共聲調个原則，因為這擺想愛選个字係「肚屎」，其中个「屎」讀音同𠊎南部腔不同。
過來，這擺个選字，也帶來專業个傲慢。當時在場个學者，認為有四個理由愛用「屎」。第一，眼屎、鼻屎等等可以看出客話特殊个構詞，故所「肚屎」當好。第二，「屎」个部首係米，代表中華文化。第三，「肚屎」也係畬語个用詞。第四點，「肚笥」忒文雅。𠊎認為這四點都大有問題。
第一點，這兜都毋係客家「特殊」个構詞方式，因為華語、閩南語都有相同个構詞方式。詳細考察客語有關「屎」个構詞，正有二種。(a)作後綴，像：眼屎、鼻屎、耳屎，愛注意這兜个「屎」都係表示「像屎共樣个污穢物」，故所『眼屎』係『眼』个『屎』，重音在後背个音節，主要係『屎』，「眼」表示地方。(b) 屎用來延伸表示貶義，表示「毋像樣」，或者係「毋正當」个動作。在𠊎个腔調中，有「(食)膦屎」个用辭。「膦」毋會有屎，故所「(食)膦屎」使毋得分開，表示「毋像樣，毋正經」，係用來罵人个話。總講一句，客話毋可能用『屎』來表示華語个「肚子」。當然，有人反對用「肚笥」，理由係「忒文雅」，這根本是文化偏見。閩南人毋愛「閩」字，因為門內一條蟲。早年推廣台灣語文个李鴻禧先生，伊一再強調閩南話个優雅，閩南語个優美，閩南語个古典。任何語言邁向文字化，「優雅化」係必經个過程。好多英語本來个土話，在喬叟个時代還在用，到莎士比亞就毋用了，改用了盡多新个語詞來替換。可見文字化必經優雅化个過程。客話本來就有盡多文雅个話，留在山歌、師傅話之中，故所毋好講客語文化就單淨使得能用屎、用尿、用膦个粗話。
第二點，屎个部首其實是「尸」（表示壞東西），毋係「米」。可見專家頃向用專家个專業來欺騙民眾，明明知講个話係假个，爛散騙人，這最使毋得原諒。
第三點，客語應該有自己个獨立性。這兜專家，有時同客家當作畬族，極端偏向蠻族。另外在用文字个中古音時，又另外一個極端講究中原文化。一下偏中原，一下偏蠻族，同這兜專家開會，馬上會得著神經病。希望以後研究客家个專家，愛企得正，愛有客家个基本立場，使毋得東風吹來，偏像東風，西風吹來，又偏像西風。第四點已經講過，客語文化毋全係粗俗文化，係本來優雅个語言，多用文雅个文字有麼个毋著呢？
