瓠藤菜
【文／黃美貞】
對戴在莊下个客家人來講，屋側角有一息泥肉就會種兜仔菜，楔幾條菣香个蔥仔、芫荽仔，還會搭一個瓠棚，發幾頭仔瓠藤菜，買菜錢就省著了。
自𠊎知人我，屋下就有耕菜園，阿姆過身後，賢孝个阿哥毋盼得菜園荒忒，就接手耕到今，阿哥從細跈到阿姆个屎背尾，點仁、洩水、改泥同打行，這兜事頭全部在在。後來，又保送去農校，在學校學異多專業科目，強調自然耕法，菜同草仔平高，揚蝶仔滿哪仔飛，故所，菜園在阿哥个手頭係越耕越有
板，種个菜斯清甜又健康，還有好相送分鄰舍，實在當岐嶷。
老古人講「清明前後，種瓜點豆」，麼个時節愛種麼个菜，愛琢琢仔去做，鬥緊毋得。搭瓜棚係大工程，頭下碼四隻楯仔先打穩，頂高个棚仔乜愛架好勢，分瓜藤來递。立夏正過，纜纜吊吊个冬瓜、菜瓜同瓠仔，看起來當餳人。這時節，愛用布袋做一个眠床好分冬瓜挺挺昂睡，三不兩時愛去巡看哪，冬瓜有較大無，好㧡轉屋下放。
瓠仔个料理異多樣，放蝦米去炒、煮腈豬肉湯，食毋去就晒瓠乾，做得放年放月，過菜荒該下，扡一細撮仔同肥湯共下煮，就係一品滋味盡好个料理。菜瓜大當遽，成下欸分葉仔遮著，無摘起來，留來做菜瓜布也毋會打爽。人講「瓠仔老，好做杓；菜瓜老，好洗鑊」，到老就還係有用處，毋會無落無著。
有一擺，後尾仔放當多冬瓜同瓠仔，阿哥喊阿弟牯去拿一條冬瓜，無想著這隻細猴仔扐一粒瓠仔弄弄仔行出來，大家看啊著就㖸到耐毋得。阿弟牯講：「看起來差毋多大，乜係青青个皮。」原來阿哥跈流行改種細號个冬瓜，同印象中个大冬瓜全無共樣，瓠仔又種長形个種，都市來个「街精」就抓無頭䌈了。
瓠藤菜个生命力當壯旺，菜瓜、瓠仔摘下來愛先切忒蒂頭，瓜仁正毋會越來越大，吸收忒瓜瓤个養份，食起來無味無緒，就打爽哩。故所，下擺去市場買瓠藤菜，毋單淨愛擇重个，還愛注意保存个孔竅，正食得著該種簡單个清甜味哦！
