食夜
【文／湯文豪】
逐禮拜係有放尞，𠊎會湊阿華同三個細佛仔，𠊎會駛車仔載佢兜轉北勢看老人家，摎老人家共下食夜，好好連絡感情話頭擺。
阿姆逐擺係聽着𠊎兜愛轉來，臨晝仔就會摎冰箱冷凍格个魚魚肉肉，拿出來退冰，還過會去菜園肚割兜仔青菜來炒，係講毋罅食或者無桌心，佢就會拉等菜籃仔去市場，買幾項仔菜來轉鉸 。佢輒常會在灶下抹抹摸摸 ，無睡當晝，搣暗晡夜愛煮个菜，一直無閒到臨暗頭。
聽着外背綯等 个狗仔緊吠，就知係𠊎兜轉來吔，就暢到耐毋得，小可仔同𠊎兜問好後，就開始煮暗餐，不管係煎魚仔、煲爌肉、煮鹹菜豬肉湯、客家炒肉、炆白菜滷、炒青菜，項項都係阿姆个手路菜。
三兩下仔，就摎菜煮好哩，阿姆就大聲喊「好撿碗筷，準備食飯哩喲！」細佛仔就會摎放到門背个食飯桌，扛出來，放在廳下中央，打開來，再用濕个抹桌布捽淨來，老弟𢯭手撿碗筷、老妹𢯭手擺凳仔、𠊎就負責兜菜、添飯，大家七手八腳 ，一下仔，歸桌仔就擺到淰淰，過後，大人細子行兼來，準備食夜。
還膨湃哪！像過年辦桌樣仔，老弟講：「該客家炒肉係𠊎盡好食个，當扯飯。」老妹又跈等講：「這爌肉係𠊎盡好食个，係攞兜仔爌肉味在飯項，做得划加一碗飯。」阿華講：「這芥藍菜炒到浸青 當錫人食。」𠊎講：「這番豆傍酒盡湛斗 。」就恁仰，你一句，捱一句，緊阿惱 阿姆煮个菜當好食，阿姆講：「好食就盡量食，最好體食忒去，恁仰𠊎盡暢。」食飯个時節電視乜無閒等，緊食飯緊傍電視，大家有講有笑當快樂。
食飽夜過後，細人仔𢯭手收揫，阿姆洗碗筷，阿華切水果，無閒忒。大家就在廳下打嘴鼓 、譫誃 、食水果、泡茶，大人就講到歡喜靂天，細人仔湊等搞桌項遊戲，搞到有來有去，毋知好煞。正經還好哪！
不管哪央時，「食夜」總係大家一日當中，做得放輕鬆，互相連絡感情个時節，毋過𫣆俚在這繁榮个社會肚，各各就無閒自家个頭路，下班轉夜到屋下，既經當暗吔。有成時，想愛煮一餐飯，做得講係千難萬難，故所，𫣆愛好好把扼同屋下人共下食飯个機會，你講係無？
