胡傳个《臺灣日記與稟啟》
【文、圖／彭欽清／國立政治大學退休教授】
發音人：彭欽清（四縣腔）
《臺灣日記與稟啟》係胡傳在臺灣做官三年半（1892年3月22到1895年8月15）个日記過同上頭个報告。厥倈仔胡適同佢整理出來，臺灣省文獻委員會將佢列入臺灣歷史文獻叢刊出版。
清朝手仔，胡傳考舉人，考了考無考著，毋過佢字墨盡飽，最好軍事過地理學。該下仔堵好太平天國戰亂正煞，政府同外國簽當多不平等个條約，佢決定做對國家社會較實際个事情，就走去東北，想愛好好仔來瞭解這隻所在。
請啊著護照過通行證，佢就一哪走，欽差大臣吳大澂發覺佢係一個人才，故所請佢做幕僚。佢先後做過土地測量、戶口調查、邊地墾務過同俄羅國界个勘查等等事情，有兩擺險險無命。佢做事情盡煞手又肯做，吳大澂特別推薦佢做後補知縣，佢毋會貪又體恤百姓，長官百姓都當阿𧩣。
光緒18年初（1892年）佢調來臺灣做全臺營務總巡，來無幾久仔，六隻月內佢就行交通臺灣，去到恆春、滬尾（淡水）、臺東、花蓮、宜蘭，連澎湖都去過。主要係考察防務設備同訓練，親身去看官兵生活過戰力个實際情形。看著个除忒寫在日記項以外，十頭八日仔還愛寫報告分上頭。行程硬斗，又水土毋合，跈佢个兩個兵仔嗄枯著，死在後山，佢在大陸帶來服侍佢个家丁乜死到臺東。
就拿佢在苗栗大湖个行程來講，光緒十八年六月初七到苗栗，初八入大湖，大湖正營、東勢角撫墾局、十八灣、竹橋頭、大茅埔恁多位所个部隊就集到大湖來誒。大南勢、老舍場山頂、番仔路坑口、老鷹山腳、老鷹嘴山頂、小南勢山頂、小南勢山腳个部隊初九朝晨頭正趕到。佢一個一個仔點名仔、驗手印，還看官兵考白仔，銃法準个就發奬金。初十又趕到新竹去。
就因為佢肯做會做，官廳跈等又調佢去做臺南鹽務提調兼辦安嘉總管，這係油水盡多个位仔，管二十零个鹽館。當時地方項个士紳鱸鰻，貼鹽務官員个手㬹，買賣私鹽，故所公家收入毋多，官員過貼手㬹个人，做盡就富罅罅仔。佢一到任，就大力整頓，該捉个捉，該關个關，同十過年鬍鬚麻加个賬目清理出來，到年底一結數，淨三個半月就有伸三萬六千零銀，往常一年正伸著六千零銀定定。
1893年，佢領命代理台東直隸州知州兼領台東後山軍務，該下仔花蓮港還係臺東州管个，佢愛理州務過軍務，還較無閒。盡壞蹄个係有八、九成个官兵有鴉片願，佢想盡辦法愛佢這兜戒鴉片，效果毋大。
1894年甲午戰爭，日本打贏中國，1895年臺灣讓分日本，胡傳在6月25正離職去臺南，擔著腳氣病，8月18坐著轉大陸个船仔，8月22在廈門過身，正五十四歲。
愛做官个人盡多，好官毋多。做官个係肯讀這本書，學胡傳實實在在个精神，定著會係好官。
