防疫新生活
【文／周鈺凱／國立中央大學客家語文碩士班】
發音人 周鈺凱—四縣腔
頭過，大家見面會扼手摎人問好。這下，大家見面用拱手取代扼手；頭過，去到哪都毋使戴嘴揞仔。這下，毋管去到哪嘴揞仔哪識拿下來；頭過，假使無錢無閒乜會想盡辦法出去尞。這下，就算有錢有閒乜歸日待在屋下。一個細細个病毒，改變咧全世界人類个生活。
其實（亻恩）个生活裡背有當多病毒，係（亻恩）輕視佢个嚴重性，乜無想過有一日病毒會分人類利便个生活發生恁多改變。這下毋管去哪位都愛量體溫，還愛注意摎人个距離，在外背食飯个時節做毋得坐隔壁，甚至連出門食飯都毋敢。上課毋係坐在教室裡背，係在屋下用電腦視訊上課。當多原旦係當慣勢个事情，這下變到當麻煩，但係，為著保護自家、保護別人，這乜係無辦法个事情。
毋過，人講：「危機就係轉機。」雖然病毒帶分（亻厓）兜恁多麻煩，另一方面，病毒乜係一個人類進步个動力。當多公司、學校改到遠距个方式，大家在屋下就做得辦公、上課，這做得講係過渡時期个過渡方法，但係，（亻厓）想這乜係科技時代應該有个樣仔。當多餐廳因為人客毋去店仔裡肚食飯，就加入外送个行列，甚至連便利商店、賣場乜有外送个服務，大家毋使出去摎人排列仔，在屋下就做得享受當多過去食毋著个料理，也係買百般東西，實在異方便。還有最重要个一點，就係人類个衛生觀念提高，當多時節（亻恩）為著方便，就毋管生活个方式、用个東西、食个食物有衛生無，病毒堵好分（亻厓）兜一個機會去反省，去改進（亻恩）个公共衛生。
（亻恩）臺灣有當好个醫療品質、好勢个全民健保制度，正經係當幸福个事情。毋過（亻恩）乜做毋得因為恁仔就毋重視病毒个威脅，麼个時節都愛注意環境个淨俐、身體个清潔、食物个衛生，預防病毒毋係個人个事情，需要大家共下來打拚。
