撞壁期
【文／邱祥祐／國立中央大學客家語文暨社會科學學系】
發音人 邱祥祐—四縣腔
「從六十分到九十分係盡容易，毋過愛從九十分到一百分就無恁該咧！」這道理聽起來真簡單，毋過愛自家親身經歷過，正做得體會其中个道理。每一個人都會有堵著撞壁期个時節，這係當正常个。有个撞壁期像流水般，一下仔就毋見忒了；有个喔，會跈等你異久，愛仰般去摎「撞壁期」做朋友，就愛看各人个智慧囉。
還記得（亻厓）在練習講演比賽个時節，先生个標準實在盡高，逐日都有新个東西愛學習。雖然講係為著（亻恩）俚个成績好，毋過嗄分（亻厓）「心有餘力，毋過力毋足」个感覺。仰般努力、仰般打拚，都還係達毋著先生个標準，雖然知得自家係堵著撞壁期，毋過仰般行就係無法度從撞壁期行出來，這種感覺實在盡艱苦。
該央時个練習，（亻厓）係學生組底背，年紀最大个學長。故所（亻厓）試著（亻厓）有做一个「模範生」个責任。一定愛做到最好，做大家个好榜樣。也係因為恁樣，又達毋著先生个標準，又看著其他个同學在該進步，毋過感覺自家就在原地踏步，就試著壓力當大，當想愛打卵退。
可能係先生乜感覺著（亻厓）个失落，就同（亻厓）講：「其實有兜時節，撞壁期係自家分自家个壓力忒大，愛適當个放鬆一下。還有，你毋係無進步，係因為你已經在九十分到一百分之間打拚了，故所你个進步，可能無恁明顯。毋過，比賽个勝負，往擺就係差在這喔！」
先生个一句話打醒（亻厓），乜係帶分（亻厓）堅持下去个動（亻厓）乜愛忘忒頭前个失落，帶等重新企起來个勇氣，好好去享受比賽，乜正會變成所謂个登真，這正係（亻厓）最大个目標！
「毋係看著希望正愛堅持，係愛堅持下去正看得著希望」，堅持下去，毋會打卵退，係（亻恩）俚个精神，客家人所謂个「硬頸」就係恁樣。乜係因為這件事情，分（亻厓）正經理解著自家文化个內涵，（亻厓）想這就係比賽帶分（亻厓）最重要个等路。
這下，毋管比賽个成績仰般，在得獎个里程碑以外，在撞壁期个過程摎經驗，都變成日後在人生道路項成長个養分。在撞壁期个過程，智慧乜增加當多。（亻厓）乜愛繼續堅持打拚，帶等這份「重新企起來」个感動，面對生活中个各種挑戰！
