中壢「以文吟社」用客吟詩
【文、圖∕徐貴榮∕國立中央大學客家語文暨社會科學學系兼任助理教授】
發音人 徐貴榮—四縣腔
中壢个「以文吟社」，係從日本時代一直到這下，少數還正常運作个傳統詩社。毋單恁仔，還逐隻月照時舉辦擊缽例會，創作漢詩，用客話四縣腔正音吟唱，做得講當少看着吔！怕係目前全臺灣還堅持用客話吟詩个詩社，係客家地區傳統詩社个寶同典範。
永曆16（康熙1、1662）年7月，明朝遺老沈光文坐船分風搓吹來臺灣府城，後來在目加溜灣（今善化）落腳定居。康熙24（1685）年組織「東吟詩社」，係台灣最早个詩社。大正10年到昭和12（1921～1937）年間，臺灣總下成立159隻新詩社，過加原來个66隻詩社，做下有225隻詩社，係台灣詩社最多个時期。台灣光復過後正慢慢仔減少。根據網路古典詩詞雅集个統計，目前還有運作个大約伸着四、五十隻定定。
大正10（辛酉、1921）年个八月半暗晡，中壢前清秀才吳榮棣先生，邀請地方个秀才邱肇基、張鉞威，文人梁盛文、古炳、劉世富、……這兜，在中壢醫院厥屋下个後花園「望月亭」作詩文酒會。後來又有人加入，就想逐擺係有良辰佳節，欽羨竹林七賢个高風，輪流舉辦，吟詩創作酒會，取「君子以文會友」个意思，在望月亭正式成立「以文吟社」，嚴守格律，專寫近體詩，用客話來吟唱。大家共推吳榮棣做第一任創會个社長，厥學生仔朱傳明做副社長，除忒原來个會員以外，還有吳鴻森、古少泉、……這恁多文人參加，輪流做東，當時並無固定个會址。
詩社成立9年過後，到昭和5（1930）年，當時各地詩社非常發達，文人相賽鬥句，作詩吟唱，以文吟社分出「磋玉吟社、崑崙詩社、藻社、鳳社」。昭和12（1937）年中日戰爭爆發，日本政府下令禁止全台灣詩社个活動，又禁止學漢文，使得私塾一間一間仔關忒，詩社毋敢活動。這年，創社社長吳榮棣過身，改由副社長朱傳明接第二任社長。第三（1939）年第二次世界大戰爆發，以文吟社分日本人強壓合併其他四社，為着大東亞共榮圈改到｢大東吟社｣，從此聽毋着缽聲咧！到昭和30（1941）年8月用慶祝中秋節做理由，召開創立二十週年紀念正集會擊鉢吟唱。
光復過後，民國35年3月12為着紀念國父過身，借中台茶葉實業公司个2樓，召開社員大會，決議恢復原來「以文吟社」个名。38年正式向政府辦理詩社登記，8月召開社員大會，籌備慶祝創立30週年，40年8月初7召開復興大會，聯絡失聯个社友，9月21以詩題「孔誕」召開第一次擊缽例會，過後每隻月就照時召開擊缽例會到這下。41年10月初3个八月半，舉辦紀念以文吟社創立30週年聯吟大會。這擺大會，除社長朱傳明，副社長劉石富以外，還有當多當時當有名个詩人拈詩同慶。
過後一直成長、壯大、興盛，到民國81年會員超過50儕，差毋多維持二十零年。民國92年8月，重新轉到創社該兩時个地點：中壢醫院（中壢中正路131號），由吳社長个後人免費提供詩社活動个場所（見圖）。到民國99年陳國威先生擔任第十一任社長个時節，發現會員緊來緊老，人數緊來緊少，伸着30零儕，無推廣做毋得，社長自家就開辦「客家詩學吟唱寫作班」，也到中壢社區大學教寫漢詩。
有關以文吟社个代表成員過佢兜个文學表現，光復前，除忒吳榮棣、梁盛文、許阿斗、古炳…這兜以外，就怕係第一代詩會个「世富仙」劉丗富、「傳明仙」（有人講「朱朋仙」）朱傳明、「石富仙」劉石富、「賢卿仙」方仰成（字賢卿）、「阿操仙」陳盛旺這五儕，人喊「中壢五仙」。所謂「仙」就係「先生」，毋係師傅就係醫生。可惜吳社長無留下麼个詩集，有關作品散落各地。第一有名个風流才子，就係「世富仙」，昭和初年仁海宮整修，門柱頂還有厥對聯；參加彰化崇文社舉辦个全台擊缽詩會，佢寫个詩〈枕頭弦〉「不依律呂妙成音，枕畔彈來韻事深，調理有針偏刺意，聲中無箭自傷心；悠揚膽落鴛鴦帳，斷續魂銷翡翠衾，今古誤人傾兩耳，家亡國破孰憐吟。」光榮得着全台第一名，轟動一時。
光復過後，有邱錦福、陳增祥、邱伯邨、邱旺財、張雲程、吳子建、莊育材這兜有名个先生，根據王湯秀春中大客家學院个碩士論文《中壢傳統客家詩社以文吟社研究》還提出湯錦祥、游金華、吳餘順、顏大豪、陳朝炘、黃玉妹、王萬龍、陳國威、李榮輝、何石松、朱英吉、李江龍這十二儕个詩，寫到當好，收集到《以文吟社擊鉢吟集》1到4集裡背。
86年吳餘順先生做第七任社長个時節，開始收集民國40年9月21日至74年3月31日，逐隻月例會擊缽个詩題，選九篇得獎个作品登錄，出版《以文吟社擊鉢吟集》以來，到107年9月初1，現任第十二任社長朱英吉先生出版第4集。到今（民國109）年12月20，擊缽777擺吔！相信第十三任繼任社長黃元雄先生從過忒年接任過後，「以文吟社」還較會有新个發展，客家吟詩个傳統毋會改變。
（本文參考中央大學客家研究碩士專班王湯秀春个論文《中壢傳統客家詩社以文吟社研究》，還過承蒙現任社長朱英吉先生个參訪、提供資料）
圖 吳榮棣故居原中壢醫院，現時免費分「以文吟社」活動个場所（2020.12.25攝）
