寧愛本鄉一寸土，不戀他鄉萬兩金
【文／何石松】
發音人 何石松—海陸腔
寧愛本鄉一寸土，不戀他鄉萬兩金，係講一個人在外背當有發展，但是，也毋會見利忘義，還係能夠飲水思源，轉到故鄉煞猛打拚，建設家園，做一隻好介模範。
七十零年前，桃園霄裡有一個吳姓後生人，分日本調去南洋做兵，時來運轉，堵著日本投降，可以轉臺灣咧。但係，佢在南洋認識一個當地細妹仔，係富家千金，當愛佢，希望佢能夠留下來，毋好轉臺灣。但是，佢想著自家屋下還有爺娘子女，還係決定轉故鄉，甘願過等窮苦介日仔。
五十年後，佢介公子吳餘鎬先生，退休以後，也有機會去新加坡教書，待遇係這位大學教授介四倍，可以講係已餳人。但是，想著屋下有一個八十零歲介老哀仔，餔娘子女，親朋好友，還過芬芳介土地，仰般也走毋開腳，表現著「寧愛本鄉一寸土，不戀他鄉萬兩金」介精神。
毋知幾時開始，桃園斯新出一句客語師傅話，名安到：天上人間――霄裡。原來，霄裡才子吳餘鎬先生，自從決定毋去新加坡教書以後，斯常常食芹菜炒田螺，當「勤勞」介寫作，又愛出書咧，該就係「天上人間――霄裡」。
這本書有深層介文化內涵，可以翻轉時空，一下仔，可以轉到四五十年前介臺灣，加上作者係一位技術當高明介心靈攝影師，摎當年介情景翕到清清楚楚，非常親切，斯像轉到細人仔時節共樣。還有當多介歷史、文化、知識，當好介文學元素，係感情介寄託，甜蜜介回味。這本書越看越愛看，因為，這裡肚，滿哪仔都係真情。
袁枚在《隨園詩話》講：「詩，一定愛有真性情。」其實，文章乜共樣，《天上人間――霄裡》這本書，滿哪仔都係醹醹介真情，原來，吳先生細細時節，也純情到當得人惜，看著別人逐鴨仔去田項討食，又會嘍鴨仔轉，看著歸群鴨仔，斯像阿兵哥共樣，排等列仔，實在真生趣，半夜，還愁該布篷下介掌鴨人，毋知會冷無？實在已感動人。
吳先生毋單淨會掌鴨仔，還會在星光半夜，忍等蚊叼蚊啄，去掌田水：一下下課，書包仔掉啊忒，就去割牛草，摎牛畜到飽飽飽。佢有一隻純真感恩介心，看著路漘青青嫩嫩介草，斯想愛割分牛食，逐年冬節，永久毋會毋記得會兜粄圓分牛食，摎牛看做一家人。屋下畜豬嫲子，又會(扌帣）供豬，看人牽豬哥，上山尋草藥，下水覓蜆仔，恁虐削介礱穀、㧡礱糠，佢也兜凳上棚――佢無梯(推)，非常做家，麼介農事家務，蒔田割禾，都當會(扌帣）手。比頭擺：「晝出耘田夜績麻，村莊兒女各當家；童孫未解供耕織，也傍桑蔭學種瓜」這首詩裡背介細人仔還較顧家。
吳先生當能體會粒粒皆辛苦介滋味，對農村一年四季愛做介事情非常清楚。從這本書可以看著頭擺農村生活介活跳寫真，斯像人聽著割禾踏機器簧咿歪咿歪介歡呼聲，風車捩到呼呼滾介絞穀聲，豬仔噦噦滾介噭聲，平安戲鬧熱介歌聲，佢係經過苦境來介，當知極樂神仙境，修煉多從苦處來，隨時都聽著中元八音和諧介樂聲，一陣陣傳來，心肝肚永遠係歌舞繁華之地，仙樂飄飄之鄉。
這本書有當豐富介詞彙，分人一看三回頭介尋味，像該氣湧噴天、發風落水、連𢫦至𢫦、冤家羅債、㧡泥打磚、噦噦嘶嘶、鬥空鑿榫、壅塵打灰介四字成語；生動介形容詞，像耳角角仔、目眨眨仔、頸橫橫仔、嘴擘擘仔、頦哊哊仔、頭犁犁仔、背痀痀仔、黃淰淰仔、濕溚溚仔、黃蠟蠟仔、光匱匱仔等非常精彩。還有呸呸滾介罵等，㕸㕸滾介食等；揞揞覆介睡等、報報滾介噴等，斯像出現在眼前共樣，正經係生花妙筆、嘴噴蓮花。
毋係詞彙豐湧定定，用法乜變化多端，一下緊觸觸仔，一下緊拚拚仔；一下眼精精仔，一下眼眨眨仔；一下燒熝熝仔，一下燒呵呵仔；一下仔嘴擘擘，一下又嘴屈屈；一下黃焦焦，一下黃淰淰；一下頭犁犁，一下頭磬磬；一下面舐舐，一下面北北；詞彙在厥手中，斯像丸子在手，迴環流轉，流水行雲，冲向九霄。
表現在語法方面更加精彩，摎頭擺介人全部請出來，所講介話，斯像佢兜企在面前共樣，該音容笑貌，熟似介風韻動作，一個個勢架架仔在面前行來行去，一個個歡喜嚦天在該打嘴鼓，比論講語尾助詞「麼介」：
買包鹽麼介！
落田挷一下草麼介！
這「麼介」像人無麼介，但是，感覺特別親切。還有語尾助詞「斯」：
心肝肚斯~
一條田漘路斯~
這「斯」一般都拉到當長，牽聲打蒂。也有語中助詞介「斯」：
該你斯愛看情形，正分佢食喔！
看樣仔斯怕矺毋著！
等等，實在係當精彩，能表現出佢介音容笑貌。還有盡多歷史性介詞彙，比論講：痛錢，月曆皮，一條牛索，閹雞，閹豬，閹牛，牽豬哥，掌水，掌鴨仔，豬胚仔，水雄，一半綱，鬼吊影，倒草等等。
又有日常生活介峨頭、眠床刀、火燂煤、桁仔、作劇、醃缸、棚秤頂、菅頭屋、分家、出浹仁、蒂頭、矺花、泥塥下等等，詞彙風雲變化，語句也靈動飄逸，俊彩星馳，比論講：
阿三妹親暱暱仔搖等屎朏花。
掣等就走。
後生人恁樣「生犁犁，死犁犁」搵等來食，毋做事哪做得？
摟出一包煙來，搐出兩支。
坐無兩分鐘，佢就像屎朏生竻共樣。
正經如見其影，如聽其聲。還有，一句話裡背表現感情介變化，比論講：
跌著爐主該就了一截囉――最無，請一棚戲介錢，總愛出，係無？
這「最無」，係感情轉接介變化，實在有味。
更有生活上介知識，像：六月雪食發痧，車前草食發尿積，鴨公青食發爛疤仔等。係農業社會常見介情景，係一種摎自然和諧，表現對大地介感情，這表現在作者對爺哀介孝順之情，對兄弟介手足之情，捉人貓子送糖介感恩之情，賣牛出門該毋盼得介情景，一種對萬物介仁愛之情，正經係舊時農業社會鄉村畫卷，純樸霄裡介醹醹深情，讀了這本書一定會分你一種「仁心愛意千江月，真性真情萬里天」介感覺；敬佩作者「寧愛本鄉一寸土，不戀他鄉萬兩金」介家風。因為，這就係：天上人間――霄裡。
※此處的「介」為大眾通用的「的」，同教育部訂的「个」之意
