慢心
【文∕徐佳妤∕台北市國小客語支援教師】
發音人 徐佳妤—南四縣腔
有一日下晝去臺北市立圖書館查資料，查核後，就騎等自行車去鞋店買鞋。（亻厓）蓋享受一個人亍街仔，因為脣口毋會有人戇戇仔等（亻厓），乜毋會有人面臭臭仔緊催（亻厓），自家愛遶幾久都毋怕。
該央時忽然聽著，一個阿爸對厥妹仔講：「共快擇一雙，你到底愛哪一雙鞋？（亻厓）愛歸去吔啦！」講核後，無幾分鐘又過講一到。（亻厓）實在蓋想同該男仔人講，細妹仔人買鞋，就愛分佢「定定仔擇」、「定定仔看」，毋好緊催人，催到人都緊張起來，原旦，買新鞋係一件盡歡喜个事情，仰顛倒變成一種壓力呢?
歸去後同倈仔分享這件事，佢應講：「阿姆，你知無？弄擺个你，乜同該阿爸共樣緊催（亻厓）。」「正經哦？仰自家都添放核吔？」今嘎回想起來，後生時節个（亻厓），蓋急性，做麼个都愛「遽、遽、遽」，若係看著細人仔拖拖挷挷，實在會分人佇毋著。一直到這下有了歲數吔，正知得愛同生活步調放「慢」下來。細人仔做得來个事情盡量莫去插，分佢等定定仔去學習、去接受挑戰、去面對失敗，大人毋使同佢(扌帣）做，抑係代佢愁慮恁多，單淨在佢等个邊脣加油同鼓勵，做爺哀儕愛曉得安排自家个生活，愛做到恁仔，對爺哀來講，正式無恁簡單啊！
每擺坐捷運到臺北車頭，一下車，人尖人，大家行路个速度盡遽，毋知在該急麼个？若係去到苗栗三義、花蓮鳳林、屏東麟洛，就會感覺著時間黏時就恬下來吔，像坐時光機到吔另外一隻世界，其中鳳林鎮在二零一四年還得著國際慢城認證。去到這兜所在，暫時同無閒个心先庰起來，毋好緊看手機仔，定定仔去體會「慢慢」个氣氛。這分（亻厓）愐著《蒔田》這首詩：「手同青禾蒔滿田，低頭就見水中天，心地清淨正係道，退步原在係向前。」有時慢下來，又有麼个相干呢?
記得有名个作家游乾桂先生講：「『無閒』係為了賺一種『尋著有閒』个代幣，『有閒』係為了提供下一個『無閒』个能量。」你，試著有道理無?
