豆芽菜个滋味
【文∕葉金華∕新北市永和國小教師】
發音人 葉金華—四縣腔
班項種了遽會一隻禮拜个豆芽菜，今晡日做得收成了！打早大自家就在教室肚無閒洎杈擇豆芽，摎豆芽个根摘忒，又白又嫩个豆芽當得人惜，鼻著異清香。班項个義工媽媽(扌帣）手摎擇好个豆芽帶轉去煠好，下晝頭再過送來打鬥敘。
吾學校个校訂課程主題係豆仔，這擺（亻厓）一步一步教學生仔仰般翕1豆芽。愛擇選豆仔、洗豆仔、浸豆仔……，放到籃仔肚蓋等濕面帕，再弇等烏色个塑膠袋仔遮光，若係毋堵好照著忒多光線，豆芽出青就會有苦味、口感變差無恁好食。逐日愛細義兜仔摎豆芽沖兩道水，沖忒水還愛分佢略略仔瀝燥，再放到陰涼个所在，盡工夫。無想著一粒粒細細隻个豆仔，正種下去無幾日，當遽就生到比原旦个豆仔大加十倍，真實厲害哪！
北方寒天時節無麼个青菜好食，兩千零年前中國人就曉得種豆芽來做菜。大約六百年前明朝太監鄭和奉了皇帝个命令，帶等兩萬七千零儕七擺下西洋。恁多人共下出外洋，想食著萋萋个青菜斯無恁簡單，佢兜在船頂就曉得用古時代傳下來个手藝，種出豆芽菜來煮食，補充營養好維持身體康健。感謝豆芽菜打幫2，使得天遠路頭3个航海做得成功，老祖先實在有智慧哪！
黃豆、綠豆都做得拿來種豆芽，毋過（亻厓）試著還係綠豆芽較好食。銀白色个豆芽外形看起來就像一把如意4，代表吉祥順利、順心合意5，做得分人煮出當多款个料理，營養又利便，食起來个味緒乜異好。正煠啊好个豆芽，趕燒搵兜仔豆油膏、掞兜仔胡椒粉，或者摻兜仔鹽，正經還好食哪！打淨食乜當餳人，毋使另外加麼个。你看！一大碗公个豆芽兩下半就分（亻厓）兜食淨淨了，分人食著會尋味呢！
外背買个豆芽菜驚怕會有浸過化學藥劑，比不得自家親手種个豆芽菜安全又衛生。自家種豆芽菜，生趣又好搞，下二擺發風搓、菜價起勢个時節，大自家做得試看啊來種豆芽菜喲！
注釋：
翕：音him；蒙蓋使不透氣。
打幫：音daˋ bongˊ；幸好，感謝。
天遠路頭：音tienˊ ienˋ lu teuˇ ；路途遙遠。
如意：音iˇ i ；玉器。也可做為祝福用語，指符合心中的意願。
合意：音gagˋ i ；滿意，合人心意。
