家鄉个味緒
【文∕王宇珊∕國立中央大學客家語文暨社會科學學系】
發音人 王宇珊—四縣腔
時代進步，交通乜越來越利便，（亻恩）兜試著轉屋會較該，但係家鄉摎都市个距離嗄無變到較近，顛倒越來越遠。煞猛打拚个時節，總係儘採食，輒輒食便利商店个速食食品；摎別人講起个話題都係最新个科技，麼个新出了，你知無?你有愛買無？漸漸仔毋記得家鄉个樣相，就算想講，別人乜無一定曉得你記憶个味緒，其實到底係麼个味緒乜講毋清，就恁樣放在心肝肚恬恬仔。
該日，鍾永豐先生摎同學紹介、分享這擺新个專輯《野蓮出庄序》，裡肚毋單淨寫食物个味緒，還有佢對記憶中家鄉新連結个書寫。本旦無好食个對面烏，離開家鄉，行入社會，食過成長个苦，正食得出苦唧唧个味道，最尾在舌嫲轉甘，正知阿姆好食个原因。〈對面烏〉就係在恁樣个感受下創出；以前農村經濟無恁好，做營養蛋白質个來源，豆類就當重要，每一隻農村一定會有賣豆腐个，〈豆腐牯〉這首歌用磨黃豆个聲——吱吱拐拐，再現庄頭聚落生活裡肚重要个聲，乜係對做這份頭路个人个敬意；〈野蓮出庄〉除忒寫美濃當地重要个農作物，乜講在野蓮經濟後背係麼人㧡等，野蓮拚出庄頭，外國嫁來庄頭个新娘乜係盡重要个一群人。熱炒店裡肚食起來脆又甜个野蓮，其實後背有當複雜个議題。
在外背來來去去打拚恁多年，有同學問起鍾永豐先生，寫過恁多摎其他地方有關个作品，還會再過轉到家鄉美濃創作無？這下還有繼續關心美濃个生活無？鍾先生笑微微仔講，其實佢認為佢從來就沒離開過美濃。（亻厓）想對鍾永豐先生來講，家鄉一直在心肝裡肚，係所有創作營養个土地，故所永遠無離開家鄉這件事。家鄉个味緒分佢料理變到一首首歌仔，盡入味个感覺表現，係分（亻厓）又愐起吾家鄉土地个記憶對吾味緒係麼个，一道道料理寫入歌仔，雖然無食著，聽著乜親像食著樣仔，做得想起這種感覺，從聽覺、視覺再過連結到味覺，（亻厓）毋單淨試著懷念還有一種新个感動。
