新百王餐廳
【文、圖∕薛常威∕國立中央大學客家語文暨社會科學學系在職專班碩士】
發音人 薛常威—四縣腔
在中壢金陵路玄天宮旁脣有一間，民國68年開始个「新百王餐廳」，得過盡多大獎，推廣傳承客家美味个飲食文化摎精神。這下个店長兼主廚係簡境宏，阿宏師。
現代人緊來緊看重食品安全个問題，毋單淨愛食著美味，還愛吃著安全健康。阿宏師个主張就係「食當季，食在地」，愛符合節氣生產、耕種、當季个農產品，正係最新鮮，最天然健康，肯用心料理，就做得表現食材个原味。
阿宏師還有率領團隊，共下打造「溯源餐廳」，對產地開始一路把關到餐廳，每一項食材，全部自家親身挑選，佢想愛分消費者看得著每一路菜「自產地到餐桌」个生產流程，吃著安心。
為著推廣在地食材，阿宏師聯合上下游个農產品供應商摎餐廳同業，組成產業價值群落，定期舉辦「媒合餐會」，共下完成溯源管理摎履歷紀錄，創造桃園个金牌好料理。阿宏師摎這放到「桃園迎賓菜」裡背个每一路菜。消費者掃QR Code，就做得尋著每一路菜个生產履歷，正經做到自產地到餐桌个透明化。群落个人，在溯源安心價值个理念下背，交流心得，做大客群，分消費者有一隻盡好个美食環境。
佢乜有去桃園各區尋了四十零樣个在地食材來入菜，像新屋个有機新香米、大溪韭菜麵、大園農Q麵、八德有機蔬菜、龜山苦茶油、薑黃咖啡、丹蔘咖啡、楊梅仙草茶、仙草雙寶、復興特產段木香菇、綠竹筍，非常豐沛，來支持在地耕種个好產品。
阿宏師个團隊乜有去小學教公益食農教育，自小學生開始推廣食農教育，分大家知食材定著愛尋得著源頭个，人正會食著安心。
「食地溯餐同創享」，食當季，食在地，食材溯源，產地餐桌透明化，共同，共創，共享，這就係阿宏師這間客家餐廳盡个社會責任。
