掛紙該日
【文／林芊慧／國立中央大學客家語文碩士班】
發音人 林芊慧—南四縣腔
掛紙係（亻厓）最期待个一個節日。
客人个掛紙對過核年就做得開始，（亻厓）等屋下這會等三月底，附近个莊頭共下選一個好日仔，共下來掛紙。在掛紙个前一禮拜，阿姆就愛開始無閒，這款該款，準備愛掛紙个東西。除核基本个金紙同紙炮仔，還有三牲、豆乾、鴨春同蒜仔、芹菜。阿姆講，對客家人來講，豆乾代表个意思係會做官，鴨春在掛紙核會同卵殼擳到碑石項，代表年年會有伸。其中看起來無麼个特別个蒜仔同芹菜，阿姆講，蒜仔代表个意思係子孫會算，芹菜个「芹」客話同「群」同音，故所有代表群子群孫个意思，我試著蓋有意思。
對（亻厓）屋下來講，掛紙係比過年還過鬧熱个日仔，歇啊在北部个大人儕同叔伯兄弟在掛紙這日，聚概都會歸到鄉下來，大家共下祭祖。這時个阿姆就會無閒到像極樂仔，除核愛準備掛紙个東西，掛紙核，還愛煮一大桌傪菜个暗餐請大家食。每擺唱核喏，細人仔就會目望望仔等等食零嗒同紅粄。（亻厓）最期待阿姆个燜豬肉，豬肉分阿母燜到綿綿，豆油个味緒油油香香，實在有扯飯，平常時毋好食飯个（亻厓），都做得食核兩碗白飯。
在墓園脣，有一頭盡大頭个番檨樹，每擺掛紙个時節，這頭番檨樹項掛等滿樹仔累累墜墜个青番檨，等大人儕在燒金个時節，（亻厓）等細人仔就企啊在番檨樹下，等等青番檨一跌下來，就共快拈起來，放到褲袋仔裡背，帶歸屋下，遽啊同佢洗淨來，接等削皮滷鹽，冰到冰箱項，過一下添就做得吃著這酸甘酸甘个味緒，在恁熱个天時，這青番檨就係最餳人吃个點心吔。這下想起來，（亻厓）个口涎水又愛液下來吔。
祭祖對臺灣人來講係一件傳統个事情，乜係一隻重要个日仔，毋過這下現代人追求環保，大家講愛盡量莫燒金紙、莫拿香，正毋會造成環境个污染。掛紙對（亻厓）來講，有細个時節盡深个回憶，有屋下人團圓个意義。但係，假使大家都做得保有減少對環境个傷害个想法，心肝肚愐等先人，用過現代个方式來掛紙，（亻厓）想不單只對先人、今嘎人，乜留分後代子孫有一片淨俐个環境。
