（亻厓）這代人食狗屎
【文∕羅肇錦∕國立中央大學客家語文暨社會科學學系榮譽教授】
發音人 羅肇錦—四縣腔
（亻厓）這代人，盡無用◦ 掛紙正講啊忒又毋記得自家係第幾多代？該載，吾叔講，恁猴！該還毋簡單，你就食狗屎，若倈仔就認食屎。該擺恁樣講過（亻厓）就記到清清楚楚，（亻厓）係食狗屎（十九世），吾倈仔係認食屎（二十世）。
到一下，食狗屎差毋多六、七十歲吔，（亻厓）嗄常年月日就緊想「食狗屎」同「認食屎」仰會差恁多。你看，「食狗屎」還係細人仔嘎下，逐年過年月半到掛紙，就還像過年樣仔， 上家下屋，親戚朋友，這尞該尞，煎甜粄，跌三烏，打紙炮仔，搞紙噼仔。掛紙一過，做田个做田，掌牛个掌牛，出莊个出莊，又愛在新个一年疲爬極蹶。「認食屎」這一代，逐日就過年，逐日就自在過日，毋過心肚空野野，毋得時日過，也毋會望過年。
再看，食狗屎該代人掛紙期間，愛拿布袋去塚埔，跳上跌落，麼个金斗盎、棺材枋就踏等過，聽著紙炮仔響，就像狐群狗黨，撞等去排列分粄仔。到認食屎這代人，掛紙期間，看毋著人分粄仔，紙炮仔響，也無人走去排列，大家有講有笑，斟酒點香，同祖先閒尞。等掛好紙共下坐桌大會餐，無就湊十過儕鬥一張，去飯店聚餐。講著食飯，（亻厓）又想著兩代人食自助餐該情況。食狗屎該人捻等手指頭，算愛幾多錢，正敢點一兩樣菜，攞兜仔豆油，遽遽去尖位仔食飯。認食屎這代人點菜，慢慢仔想當久，正知自家愛食麼个，點好也無使算總共幾多錢？反正拿大張个紙票佢會找。
（亻厓）這代人，盡尷尬。還細嘎下，大人教細人仔全部用打用罵，家長去尋先生，就家濟仔裝閹雞送先生，三拜託四拜託，拜託先生同（亻厓）打同（亻厓）罵，下二擺細人仔正會有出息。大人講，毋聽話就愛食竹筱粄，先生講，無聽教，就愛食黃藤條。鄉下窮苦人家，賺食就難，堵著細人仔不受教就手抨腳踢，有兜痛到走分大人遽，該就石牯磚截擲等去。一下，認食屎這代人打毋得罵毋得，做爺哀个愛教細人仔，連講就毋多敢講，莫講愛打愛罵。做先生个係講性體毋好，出手打細人仔，結果輒常會分家長打倒轉來，無就分家長告，連鐵飯碗就會打爛忒。
（亻厓）這代人，盡值得。後生時期，無電無網路，過个還係當原始个生活。劈草仔，倒樹仔，畜放欄豬、放山雞、放山羊，兔仔、貓仔、狗仔、羌仔滿山走，耕田蔭水、委秧蒔田、割禾晒穀，埔園種菜、種果作，寮肚種洋菇、種木耳，灶下煮飯炒菜、暖水治雞鴨。所有生活有關个微毛末節，就愛親手親身親做，這正安到自然人生。一下老吔，麼个就電化網路化，無使出門囥到屋下，就做得有飯食、有戲看、有書讀、有錢賺。一隻手機做得講話、做得付錢、寫書信、做生理，所有生活有關个微毛末節，就做得用電、用網路、用手機來完成。這兩種全無共樣个生活，（亻厓）這代食狗使个人，就有過過，就愛接受這兜轉變。想看啊哩，實在盡值得。
故所，食狗屎个（亻厓）這代人，係盡無用，盡尷尬，又盡值得个人生。認食屎个人，係知這種人生个無用就係值得，佢這兜呢，定著會歸肚屎仔尷尬。
