來講藍衫
【文、圖／鍾榮富／南臺科技大學應用英語系講座教授】
發音人：鍾榮富（四縣腔）
毋知在麼个時節開始，藍衫變啊客人盡重要个圖騰，或者係意象。反正有客人參加个表演場所，定著有人會著藍衫，唱山歌，打採茶。客委會舉辦个活動，也會有人著等藍衫，在會場行上行下。盡像無著藍衫，就毋係客人个樣仔。這實在有需要好好討論。
十過年前，𠊎成立「高雄客家鄉音樂團」該時節，在南部鄉下地方，下把下還會看著老人家著等藍衫，坐啊在榕樹下曬日頭，遠遠看啊去，盡像發夢，盡像歸轉到三十年前个樣仔。故所團員建議愛採用藍衫同紙遮做團章，做logo，無人反對。後來樂團出去表演、參賽、出國交流，都隨團帶等畫有藍衫同紙遮个隊旗。有一擺還辦過藍衫現代化个活動，請南部大學服裝科个教授，帶等學生來設計現代藍衫。毋過，效果毋係盡好。活動辦過以後，就無人再講藍衫現代化个話題，也無人再著藍衫出來唱歌仔。
𠊎還細个時節，隔壁鄰舍个老人家，全部都著藍衫，無論去田上做事，抑係在屋下坐尞，總係一襲藍衫，自自然然。該下，也無感覺到藍衫有麼个好看，有麼个特色，反正該係老人家个習慣。到𠊎爺哀个時代，莊上已經蓋少人著藍衫了，後生人著个衫褲，完全同來大路關做生理个鶴佬人共樣，無半息差別。上槓阿田伯母過身以後，大路關同河壩兩庄頭就無人著藍衫了。藍衫行過一個世代，就像頭擺个燈盞火共樣，屬於歷史个一個殘跡。𠊎想，可能無人會將燈盞火看做客家文化个代表吧?
有幾下擺，在審查客語課本个時節，看著教科書拚命採用藍衫來代表客人，講來講去，還係講毋清楚藍衫愛仰仔代表客家文化。委員底中，有人足蠻反對，𠊎自家盡同意該委員个看法。實在講，文化就係生活。愛在生活中，看仔著，摸仔著个東西，正會在心底產生意象，變做文化个一部分。比論講：鹹菜、粄類、夥房，雖然漸漸減少，漸漸消失，總係還看一著，吃一著，還無完全離開客人个生活。但係藍衫，同燈盞火共樣，除了戲曲表演做道具以外，實在看毋出代表麼个客人特色。既然無人將燈盞火看做客家文化，嘎仰會將藍衫看做客家文化呢?實在想毋通。
今下，藍衫淨在客人个表演活動，或者客家節目底中，看仔著。在其他个所在，不論當地有幾多客人，都看毋着人著藍衫了。換句話講，藍衫係50年代以前个客人著个衫褲，今嘎無人著藍衫了。Ngan(我等) 使毋得看着民國以前个客人著長衫古裝，就恅著客人个代表衣裝就係古裝長衫。
