思念
【文／周杏芳／國立中央大學學士後中等教育客語學分班】
發音人：周杏芳（海陸腔）
細人時節
教𠊎做紙鷂仔
牽𠊎去運動坪放
紙鷂仔啊 紙鷂仔
你愛飛到哪位去
飛到高高个天頂去
讀書時節
帶𠊎去看鷂婆
吩咐𠊎愛立志飛高高
鷂婆啊 鷂婆
你愛飛到哪位去
飛到高高个天頂去
出社會時節
陪𠊎去看白雲
希望𠊎摎煩惱个事情
跈等風飛走去
白雲啊 白雲
你愛飛到哪位去
飛到高高个天頂去
天頂有
最生趣个阿爸
最有智慧个阿爸
最惜𠊎个阿爸
白雲啊 鷂婆啊
敢做得分𠊎相借問
這下
𠊎手項拉等个
係紙鷂仔
也係𠊎長長个思念
