人客來尞
【文／黃美貞】
禮拜五暗晡頭，阿德帶一个細細仔人客轉屋，佢係一隻地鼠，名仔安到圓圓，因為學校愛消毒，屋下又堵好歇在學校脣項，故所同學就拜託佢𢯭手渡三日。
圓圓有灰灰个毛，圓㪐㪐个目珠，看起來當得人惜，毋過，可能係正來到生份个環境，就囥到竇裡肚，無停無動。聽阿德講，圓圓个性體當活跳，歸日仔在教室無閒洎杈，上課个時節，佢就在箱仔肚遊遊野野，下課該下，就煞力牯走圈仔做運動，一下仔走遽遽，圓盤就捩當轂，走了幾圈仔又放停。走𤸁了，兩隻前腳扳等水罐仔，盡命牯吮水；肚飢了，斯一息就無細義，包粟仁、豆仔同飼料塞著歸嘴角淰淰，有罅得人惜，難怪一群細阿哥仔惜到命肝仔樣仔。
阿德講煞就背等書包仔去補習，還特別吩咐𠊎愛渡好圓圓。就在𠊎開始亼麵糰做麵包个央時，吾頭那𢳆啊過去，仰會有一雙目珠乜看等𠊎，阿姆哀哦！圓圓毋知企在該幾久哩？係走入去間項愛仰結煞？𠊎先去關間門，莫分佢走入去。等到門關好勢，又尋無圓圓，心肝肚開始踩踩踏踏，這看該看就無看著影仔。好在過一下仔，圓圓又走出來了，𠊎定定仔跍下來，用兩隻手將佢托起來，輕輕仔放轉去箱仔裡肚，就驚使忒大力怕會著傷。
記得做細人仔个時節，屋下總會畜兩條狗仔、一隻貓仔，一來做得掌屋打老鼠，二來食伸个冷飯菜味，就餵佢兜食，一日早暗兩餐。讀書轉屋，書包仔一拂，定著係先揇一下貓仔，搞一下狗仔，摎這兜動物講話，講乜奇怪，不管有麼个煩惱，全部就會毋見忒，心情黏時從烏陰烏陰變成一色晴天。係去過家尞，就風神碌仔帶等狗仔去，細人仔搞遊戲歡喜靂天，狗仔乜搞到在地泥滾滾碾，實在當暢快。
盡多細人仔，就希望屋下做得畜細動物，做得做伴講心事，毋過都市个樓仔屋狹蹶蹶仔，毋比得莊下天闊地闊，做得自由自在。三日過忒，圓圓又倒轉去學校了，毋過想著該兜陪𠊎共下大个狗仔同貓仔，心肝肚就有一種幸福个感受。𠊎又開始望等圓圓有閒來尞哦！
