蠶仔
【文／葉金華】
發音人：葉金華（四縣腔）
三月初𠊎兜拿著一細垤紙，頂高有當多細細粒、看起來烏金烏金个蠶卵。𠊎摎該垤紙放在塑膠盒仔裡肚，脣頭還放兜仔桑仔葉，學生仔下把仔有閒就會來看一下仔。
𠊎帶等學生仔去校園肚尋看啊哪位有桑仔樹个葉仔好摘，乜在網路項尋了幾隻摎蠶仔有關个影片，放分學生仔看。上學期𠊎識摎小朋友講過「馬頭娘」个故事：有一隻白馬想愛討主人个妹仔做餔娘，嗄分主人㓾忒剝皮、晒在竹篙頂。起一陣大風，白馬皮摎主人个妹仔捲起來，飛到遠方个樹林肚，細阿妹竟然變做蠶仔了。
傳說五千年前，中國人就曉得仰般畜蠶仔這種昆蟲了。蠶仔个一生當短，正有幾隻禮拜定定，一隻嫲个蠶蛾斯做得降出五百隻卵。一隻結好个蠶包大體做得抽三百到九百公尺長个絲，做得紡織靚靚个綢緞，也做得做蠶絲被；蠶仔屙个屎係中藥个「蠶沙」，做得泡茶食；有豐富卵白質个蟲包乜係一項美食。蠶仔異有價值，歸身都係寶。
過了兩隻禮拜，拜一朝晨𠊎入教室，看著盒仔裡肚有當多像蟻公共樣大个細蠶仔在該半燥水个桑仔葉莖項，無葉仔好食了，脣頭个細垤紙項正伸著白色个空卵殼定定，無人知佢兜係麼个時節出世个。𠊎煞煞去摘幾皮桑仔葉，用淨水摎萋萋个葉仔洗淨、拿淨俐个桌布捽燥，再放到盒仔裡肚。
學生仔下課時節在脣頭圍一圈，看等盒仔肚个細蠶仔，你一句、𠊎一句，還摎該兜細蠶仔子一隻隻安名仔，盡生趣！大自家試著有一滴仔奇怪，細蠶仔係毋係食毋慣新个葉仔，換好葉仔了後仰會無麼个停動？無想著再過加一日該兜細蠶仔通盤都死淨淨了，佢兜出世可能還吂過三朝，還衰過哪！知著這件事情，逐儕都當毋盼得。
細蠶仔正經還脆命哪！佢兜仰會死忒呢？恐驚係分漂白水毒著。為了預防新冠肺炎，班項差毋多逐日都會消毒。該日拿來捽桑仔葉个桌布上隻禮拜識用稀釋漂白水洗過，無想著嗄害死這兜細蠶仔，𠊎想愛摎佢兜會失禮，真是敗勢！
