太陽星君个契子
【文／練錫魁／國立中央大學客家語文碩士班】
恭請燃燈祖師 法旨太陽星君為信士純妹个倈仔阿賢牯消災解厄、元亨利貞 。
誠心在桌頂擺等一隻閹雞、柚仔、紅肉李，算起來異豐沛，阿姆牽等阿賢牯瘦薑个細手，擎等三大支清香，虔心个三跪九拜，向星君求絭來戴，祝願倈仔平安順勢畜大 。
阿賢牯既經八歲了，圓身看起來嗄像六歲細人仔「黃頭狗嘴 」，毋知个人恅著賢牯分人苦毒幾悿樣。毋過頂背六個阿姊對佢並毋會差，難得屋下有一隻接家神牌个人選，少分人唸全係了本貨就好，惜佢惜到像命樣仔。講來阿姆供佢个時節，身頂早就無油無臘、奶菇粕粕，捋毋出乳水，阿姊這兜早就摎奶水吮食忒了，有一息仔歹勢，故所麼人乜愛對佢好正著。
屋下係做山事个，種茶較多，園肚兼等種幾十頭紅肉李，在褲浪埔溜下山排邊脣，面𢳆 (ngau55)向大河壩。在該量時茶米早就賣無路了，無法度在市場項摎英國人愛食个錫蘭紅茶相拚，該李仔樹打李仔，肉啾紅大粒又甜，想加添收入還係當打爽無銷路。阿賢牯摎眾姊妹賺著食，歸日在樹下溜溜轉，阿婆發譴大喊：「你兜哇！李仔樹下埋死人再食……。」根本無人愛掣佢照食，滿姑逐日擎等祛把逐，佢兜打毋會驚！莫怪連拜太陽星君个水果，阿姆還轉水流東妹家摘。
記得細細時節，阿賢牯鬼門關行幾下到。有一擺，堵著風搓又發燒，疔仔發到歸頭歸面，嘴角又爛，阿姆無錢拆藥仔，番仔火精貼到花啦嗶哱，全身抓到血流血著，無一節好，差一滴仔就死無命。阿姆遽遽揹到鎮項，尋醫生館。先生搖頭摎阿姆囑咐講：「細人仔做得分佢食幾多算幾多。」阿姆聽著正會揇來分太陽星君做契子 。跈著阿賢牯成長過程，阿姆毋識放棄佢，有麼个好食就塞分佢食，阿賢牯好動，打球運動，汗流流，嗄好了……其實阿姆誤會先生个話語，係細人營養無罅定定。
十五歲該年「契子約」自動完成。阿姆愛心摎太陽星君暗中保庇，這下變成康健、高大个少年郎，阿姆惜子正經係長江水。
人講：太陽星君顧陽，太陰娘娘保陰。你認為呢？
