𠊎愛苗栗
【文／湯文豪／國立中央大學客家語文暨社會科學學系】
苗栗在臺灣个中北部，境內山仔多，平洋少，故所有「山城」个名號，地勢係對東南向西北斜等下去，山地、丘陵、台地、平洋當有順序个排列，還有幾下條河壩貫穿其間。有異好个生態環境，當值得𠊎兜共下去研究个。
苗栗旦勢都係客家人，刻苦耐勞，煞猛省儆，佢兜延續了頭擺耕種人「晴耕雨讀」个精神；辛辛苦苦，一步一腳印，定定仔在自家个土地項，煞猛打拚个成果。逐鄉鎮都有佢兜个特殊產業，再加上客家美食都異有名。透過網路，緊向外縣市宣傳摎推廣，餳來異多外縣市个人客，來苗栗遶尞，同苗栗建設變到儕儕都想來个好所在。
還記得𠊎讀小學四年，在避暑个時節，阿爸駛等一台兩十年个犖确車，載歸屋下人去南庄尞，沿途經過个山路，崎當嶝當彎斡！車仔強強就蹶毋得上，𠊎兜就在尾項拚命牯緊喊，加油！加油！阿爸就盡跺油門，總算，蹶過峎頂，翻過山頭；𠊎打開窗門緊看外背个光景，該微微个風吹入車仔肚，感覺當涼；遠遠看啊去，該窩壢項个雲，飄飄渺渺，濛沙一片，看着心情異開揚；該山頂个樹仔生到榮榮；路脣个花一蕊接等一蕊開到當靚；樹頂个鳥仔，你一句𠊎一句，緊唱等迎賓曲，親像在歡迎𠊎兜樣仔；還有該山壢肚个水鮮鮮，魚仔無煩無惱在水肚泅來泅去 ，一息就毋驚人，這位个空氣當好，汙染少，係當值得𠊎兜一去再去。該時節，𠊎心肚想，係講，搬來這戴，毋知有幾好吔！毋多知仔，𠊎兜來到飯店，享用客家菜「四炆四炒」摎鱒魚料理。還好食哪！害𠊎這兜，食吔還想愛尋尾呢！
對該央時，𠊎就愛上了吾个故鄉，因爭苗栗有恁多好遶尞个所在，同恁多好食个料理，恁好个地理環境同好山好水，再加上這位天時異好，異少發風落雨，還過人同人之間有醹醹个客家情，係異適合長間在這歇下來个。
係講無「前人種樹」？哪有「後人尞涼」个道理。故所，𠊎愛知足，期望𠊎个後代子孫，愛好好痛惜這垤土地，毋好緊在破壞，愛分佢世世代代傳承下去，綿延不斷到永久，同佢建設變到一个「健康城市」，繼續創造無限个風光摎生命力。
