紙炮
【文／邱祥祐／國立中央大學客家語文暨社會科學學系】
發音人：邱祥祐（四縣腔）
「爆竹一聲除舊歲，桃符萬戶迎新春」。為著迎來新个一年，打紙炮係過年時節做毋得少个風俗，民間有一種為著愛趕「年獸」个傳說。毋過，乜毋單淨係過年時節，像公司開業還係結婚，都會有打紙炮个習慣。
「紙炮」係一種喜氣个象徵。到今，「紙炮」這兩個字，代表个既經毋係正經个紙炮定定，一句「打紙炮啦！」代表个乜係一種恭喜个意思！
跈等時代進步，科技个發展越來越新穎，手機仔傳訊息个功能係現代人逐日都會用到个科技。若係講「紙炮」這兩隻字用手機仔个文字表達出來，乜做得係一種恭喜个代名詞。頭擺人个一句：「打紙炮啦！」，隨等就係劈哩啪啦个聲響，當鬧熱喔！這下手機仔个訊息傳來一句：「打紙炮啦！」，雖然就無恁歡喜烈天个感覺，毋過這種用文字表達出來个紙炮，嗄毋會失忒原來恭喜个意思，還過有一種當特別个味緒，這就係文字表達个藝術啊！
想起該央時𠊎參加比賽，最後當順利打著頭名，結果手機仔響無停，有當多个人傳訊息來恭喜𠊎。毋過分𠊎印象最深个，毋係同學傳分𠊎个各式各樣，用錄音、圖片个恭喜，係客語先生个訊息，訊息个內容就係「打紙炮啦！」
該央時𠊎試著盡親切，心肝肚真感動。客家人个互相鼓勵就係恁樣，雖然係簡單用手機仔个文字來表達，毋過嗄帶分𠊎當多个燒暖，還有淰淰个人情味。
語言係文化傳承當中，當重要个一環。在對話當中，做得體會著文字裡肚還較深个意義。這下，不管係比賽打頭名，還係考試考到第一名，先生都會用這「打紙炮啦！」个訊息傳分𠊎。這就係本土語言个藝術，愛好好保存，還愛傳承下去。
這下聽到劈哩啪啦響个紙炮聲，都會分𠊎想著當多个回憶，會想著該央時先生該句「打紙炮啦！」，還有該央時得到頭名个歡喜。希望這份感動做得一直留在𠊎个心肝肚，𠊎乜愛好好利用這句「打紙炮啦！」，傳分大家帶有淰淰人情味个恭喜文字，做一个有溫度个客家人！
