中央大學電子報

《百年客諺客英解讀》出世了

【文、圖／彭欽清／國立政治大學退休教授】

　　 真多客家界个朋友知𠊎好買彩券，知𠊎買彩券係想圓一個夢—請一組人馬來翻譯《客英大辭典》。毋過無偏財運，到這下還在該買。

　　 1980年買著南天書局翻印个這本辭典，𠊎就詳細讀，發現佢係客話个百科全書。當多在臺灣還用个詞匯過句仔都尋得著，學著盡多。2000年邊仔，同公家提一個計劃，愛整一組人馬來將佢翻譯到中文，分還較多个人參考。計劃無過，𠊎正會去買彩券，想自家出錢來做。

　　 2010年𠊎在網站項對荷蘭同英國，買著1905同1926年《客英大辭典》个原版。詳細比對，越試著這本辭典實在係寶，寫幾下篇相關个論文，幾下擺在公開場合，也識請客家學術界應該愛同恁寶个語料做盡翻譯出來，毋過還係蚊仔叼牛角。

　　 四年前同中央大學个黃菊芳教授，共下同客委會申請這本辭典俗諺語个翻譯過考證研究計劃，審核通過，就煞煞做。

　　 這本辭典記錄个主要係河婆腔客話，算大陸个四海腔。𠊎講四縣，也講海陸，又教英文，對辭典肚个客話詞彙、例句過發音，有自信捉得著七八成仔，英文也無大問題。毋過實際翻譯起來，正知已罅囫。客語同英文解釋合抑毋合、文化个差別，還過有音無字等等問題愛解決，食力又耗工，愛斟酌又斟酌正定稿。

　　 下背用幾隻例仔來講：

　　 老雞嫲較好踏。英文係the old hen fear less the rooster, the old are easier to consult with. （老母鷄比較不怕公鷄，年長者比較好商量。）英文無將“踏”个意思翻出來，就愛加説明。

　　 分碓踏過，看著礱勾都著驚。原句有音無字，英文係：if one should be struck by a pestle he will fear when he sees a grinding mill.（如果一個人被碓杵擊打過，他看到磨礱都會怕。）對英文解釋去查這本辭典“碓”過“礱勾”个解釋正揣出客語字。

　　 水攏總倒，在我馱來。原句乜係有音無字，英文係：Fig. I shall have to pay all the consequences. （意指我必須承擔所有後果。）英文係引伸意。揣誒又揣，又查這本辭典“攏總”同“馱”个解釋正決定客語字。

　　 生理好做，夥計難合。1926年版英文係：the business is good but to form a partnership is difficult to agree about.(生意很好，但很難建立雙方合意的夥伴關係。) ;1905年版个係： It is difficult in business to take in a partner.(做生意要招個合夥人不容易。) 兩版个英文無共樣，就將原版个也列入説明。

　　 三朝痲，七日痘。1926年个英文係：measles show in three days, smallpox in seven.(麻疹在三天後顯現，天花則是七天後。) 1905年版个係：measles take three days, small-pox seven, to come out.(麻疹要三天才會顯現，天花則要七天。) 兩版都將“痘”翻譯到small pox(天行痘)，“痘”實際係水痘，英文係chicken pox。校訂就順嗄仔指出來説明。

　　 其他還當多真難剃頭个問題，黃教授同𠊎盡量仔一個個仔同佢解決忒。

　　 這本《百年客諺客英解讀》大約仔占歸本辭典个内容个百分之一，有這擺翻譯同考證个經驗，𠊎還較愛煞猛兜仔來買彩券，就望講著大獎，好尋兜人馬來翻譯歸本仔辭典，係講錢伸來多，又還做得贏，就連1905年版也同佢翻譯出來。