中央大學電子報

牛汶水同熝湯粢

【文、圖∕徐貴榮∕國立中央大學客家語文暨社會科學學系兼任助理教授】

　　 客家庄抑係客家人一到做鬧熱、有喜慶、做好事个時節，盡喜客个就係打粢粑（圖1）。打好粢粑，在食飯前請人客食點心，分肚屎先打一下底。講着食粢粑，不時就會想着有人企等在該緊斷粢粑，一群人圍等，手拿筷仔，緊剪粢粑搵該香香个番豆糖粉，緊食粢粑，緊同親戚、朋友打嘴鼓。又講又食，又食又講，逐儕都笑弛弛仔，該種親切个情景，分人試着還有味緒哪！

圖1 粢粑

　　 同粢粑共樣个食品還有牛汶水同熝湯粢，都當餳人食。毋過，當多人分毋清楚，講共樣咩！共樣係粢粑搵該薑嫲烏糖水，落兜仔番豆仁、牛眼乾，毋單只形投共樣，食起來無麼个差別！論真來講，認真兜仔看圖2、圖3，就會試着有兜仔無共樣。

　　 這兩樣食品比較起來，熝湯粢較扁，有一隻窟，就係因為做法無共樣。牛汶水係用熟粄，就係將蒸熟个粢粑仔斷好，直接放落薑嫲烏糖水項浸浸啊來食，因為係熟粄，佢就一種色定定。熝湯粢係用生粄（圖4），先挼生粄，放到毛籣項等水較燥兜仔，正放落鑊仔項蒸，蒸熟吔正放落薑嫲烏糖水，因為係生粄，故所佢做得做幾下種色合共下。

圖4 熝湯粢个生粄

　　 做麼个熝湯粢較扁，有一隻窟呢？還有一隻故事喔！聽講頭擺有一個婦人家，想愛做點心去分田項辛苦做事个老公食，結果當在該做个時節，看啊出去，遠遠在田項做事个老公，當在該同一隻細阿妹仔打嘴鼓，有講有笑。緊看緊毋傪勢，心肝就緊閼。一閼啊去，拿等手項做等个粄仔，緊搭緊打又緊揤，捉該粄仔準厥老公來打來揤，嘴項緊念：「撚一下、搭一下、揤一下」，正會又圓又扁又一窟，分人安到「毋甘願粄」。頭擺緊挼熝湯粢生粄个時節，就會恁樣緊念緊做。

　　 恁樣看起來，係毋係牛汶水當簡單做，熝湯粢就無恁該囉！工夫異多，也較有趣味呢？

※此處的「着」，同教育部訂的「著」之意。