燕仔尾長長 十月去 二月轉 轉來簷下做爺娘
【文／何石松】
發音人 何石松—海陸腔
燕仔尾長長，十月去，二月轉，轉來簷下做爺娘，係一張尺幅千里，燕燕于飛介真情畫卷。講燕仔勞勞碌碌做爺娘介艱辛過程，無一滴仔怪怨，無一息仔偷懶，不管仰般，終究係恁樣介快樂，帶分大家無窮介歡喜摎幸福。
這係充滿家庭幸福，家道興旺，添丁發財，百福千祥，一種好頭彩介諺語。因為，燕仔從秋冬之間介十月，離開北片，飛向南方，一直到明年春夏之交介二三月，當守時守信用介，又陸陸續續介飛轉來，尋著一隻好人家，作竇起屋，生卵孵子，歡歡喜喜做爺娘，使歸隻鳥竇金晶爧，鬧熱煎煎。
意思係講，燕仔一生人非常無閒，十月去，二月轉，黏皮就愛起屋作竇，生卵孵子，傳宗接代以後，又愛千里遷徙，過著當勞碌介日仔。但是，夫妻還係當恩愛，甜蜜合作盡做爺娘介責任。正經係「夫有千斤擔，妻㧡五百斤」。
有句客家令仔講「頭鸚哥，尾剪刀，肚底有黏泥，離泥成丈高。」斯係講燕仔介頭那像鸚哥，尾像一把剪刀，佢兜非常辛苦介從外背尋兜樵草泥仔，飛到成丈高介屋簷下，開始起屋作竇，肚底難免會黏兜泥仔，也代表著「有土斯有財」介進財之象，係講你屋下有燕仔飛來作竇，該愛恭喜你喔，家運一定大吉大昌。
燕仔，毋係儘採就飛落人屋肚去作竇介，佢會選擇開洋介屋場，淨利鬆爽介位所，還愛看這間屋主人係毋係善良，毋好起屋起到一半，斯分人追走，凡是分燕仔選著介吉祥之地，主人大概係非常鬆容介，無愁無慮，係一隻好人家。因為燕仔毋落愁人之家，毋落無福之地，燕仔會分主人帶來光明，主人也會分燕仔帶來安全幸福，這就係摎自然介一種和諧，年長月久，互相影響，希望會「年年發達年年旺，日日進財日日興」。日仔自然就會食著豐湧。摎燕仔來往，慢慢斯會發達起來，難怪人講「燕仔尾翹翹，毋摎窮人笑；燕仔尾叉叉，毋到窮人家」。
這毋係燕仔看毋起窮人，係講燕仔愛選淨俐亮線介屋場，會使著家道興旺起來，因為燕仔當好一色青天介光明，佢係在空中飛等討食介，一片飛，一片摎眼前介蚊仔蟲仔一隻一隻食忒。聽講佢一季之間，可以食忒25萬隻蟲仔，對吾俚屋脣介環境能夠大大改善，一種清朗鬆爽介感覺，係最優秀介環保志工。尤其係燕仔兩公婆永遠一條心，共下打拚，係一隻幸福介家庭。所以盡多人希望燕仔來屋下作竇。
因為燕仔落屋，會帶來一年四季興旺喜慶。看該燕仔選著好屋場以後，就雙雙對對，銜泥作竇，正經係燕仔銜泥嘴當穩，佢係仰般介專心；燕仔銜泥無腳跡，來無影，去無蹤，感覺上一下仔竇就作好咧！
其實，燕仔係當無閒介，假使竇無作好，就無位所戴咧，不論如何，一定愛遽遽分佢入新屋。有兜好心人士，常常會在屋簷下搭隻架仔分佢作竇，恁仰，一下仔就可以看著燕仔雙雙對對，歡歡喜喜唱歌，帶來春暖花開，鶯鶯燕燕，暖暖春春，停停當當，純純真真，鶯聲燕語介快樂景象。
哇！原來，燕仔在該做好事請人客，辦理終身大事啊，所以大家會念「燕仔尾長長，屋下看新娘；燕仔吱吱嗟，屋下看行嫁。」燕仔落屋係一遍介歡樂。正經係看新娘，毋使出門；看鬧熱，毋使走遠，難怪人類在祝福人新婚賀詞，常常會講著「燕爾新婚」，意思係講「祝你新婚，像燕仔恁樣介幸福快樂！」因為佢兩儕總係眼箭來來去去，深情款款，含情脈脈，恬恬無講出來，所謂「燕仔銜泥口愛穩，蜘蛛結絲在肚中」，心中永遠有你，相思常在內心，所以，燕仔，係新婚百福千祥介代名詞。燕仔落屋，會帶來歸年介幸福。
燕仔一生人都恁辛苦，從作竇、生卵、孵子，愛歸個月介時間，鳥子出來以後，鳥嫲飼子逐點鐘有15次，鳥嫲飛出飛入去尋食，來來回回差毋多愛500零擺。一隻熱天消滅100萬隻蚊仔。到了哀瘦子大介時節，又愛教佢學講話，學洗毛，學行學飛，又驚貓來銜，又驚狗來咬，教子係當費精神啊。
忽然有一日，翼仔翍起來，展翼不回顧，隨風四散飛，空中喊子轉，盡喊也毋應，轉到空竇肚，啾啾唱哀音，燕仔啊燕仔，毋使難過啊，樹大本來就會杈椏，子大就愛分家，你，毋係恁樣過來介乜？當初爺哀唸，今日你愛知！
原來，燕仔又係離別介代名詞啊！十月去，二月轉，轉來簷下做爺娘，子女成人長大就係離別介開始。其實，燕仔，你係離別介祖先啊！所謂「燕燕于飛，差池其羽；之子于歸，遠送于野」，正經係千古同心。
好得，燕仔飛走以後，還有轉來介時節，雖然勞燕分飛，仍然守時守信，在屋簷下做爺娘，摎人共樣，有碌正有福，一代一代介碌等下去。
※此處的「介」為大眾通用的「的」，同教育部訂的「个」之意
