大河壩小書店
【文、圖∕薛常威∕國立中央大學客家語文暨社會科學學系在職專班碩士】
發音人 薛常威—四縣腔
「大河壩小書店」係今年11月在中壢高中旁脣正開業个一間全新个「獨立書店」。「獨立書店」摎「連鎖書店」無共樣，賣麼个書，經營个方式當有自家个主張。「大河壩小書店」个店主人，後生个羅先生希望這係一間中壢个、客家个、後生人个書店。
客家話「河壩」就係河流个意思，安名安到大河壩，係希望做得遠遠長流，河壩乜像母親共樣做得滋養大地。用「小書店」摎「大河壩」个反差，表示這書店當可愛、當得人惜个意思。另外乜代表獨立書店个精神，雖然亻恩兜恁細隻，乜做得分還較多關心這片土地个人講出聲。
書店就一樓定定，裝潢當簡單，毋過這位本來就毋係用浮華、享受來餳人个。當然做得在這看書，啉杯茶，啉杯咖啡。這位乜有舉辦當多个講座摎唱歌表演。特別个係佢兜邀請來个大體係客家人，講个係客家个故事，唱个係客家歌，算起來係非常小眾个市場。正新開个書店，後生人肯恁樣形堅持理想，實在無簡單。
這個12月12號下晝，「River河壩講堂」邀請著張典婉小姐來講「該央時。該兜人」，講个就係戒嚴該隻年代，母語文化係仰般形保留傳承个，又經過麼个風風雨雨？關心客家个人做得來聽。
一間一間書店緊開，中壢這下嗄變到緊來緊有文化个所在。希望這間後生人正開个獨立書店做得像大河壩共樣，長長遠遠，影響還較多个人。
