投稿去
【文／邱祥祐】
發音人 邱祥祐—四縣腔
擎起筆、拿張紙，寫文章就恁簡單。毋過，愛寫出好文章，就無恁該喔！亻厓這下啊，頭那強強就愛爪溜皮了，還係想毋著愛仰般寫較好啊！
這件事情就愛從一隻月前開始講起，該央時亻厓个客語先生毋知從哪位得著个訊息，講有一個「童話故事」个文章徵稿活動。先生還摎亻厓講當簡單啊，儘採寫寫啊就好，該央時亻厓乜戇戇答應，仰會知寫出一篇好文章恁難喔！
寫童話故事，最頭先愛先定題目，再發揮自家个想像力來設計角色摎大綱，還愛照顧著故事內容个「起、承、轉、合」。亻厓平常時就無照顧別人个經驗，這下一下仔愛照顧恁多个角色，實在當有挑戰性，這就係亻厓這下做麼个頭那會爪溜皮个原因。
經過一段時間个打拚以後，總算係寫好了。亻厓當歡喜个傳𠊎个文章分先生看，本本想講做得歇睏了，吂知，先生嗄講：「你个文章啊，無用著『譬喻法』摎『擬人法』，童話故事就係愛用這兩種方式來寫正會生趣啊！」
阿姆哀喔，亻厓看等文章，佢乜看等亻厓，亻厓還係想毋出來愛仰般譬喻啊。亻厓想亻厓該央時正經係分先生騙去了，毋係講寫文章當簡單咩？這下，亻厓只好乖乖改文章。看等文章底肚个字，每一隻字都像係嘴擘擘緊笑亻厓，實在還得人惱！
總算，在期限前一日，亻厓將文章寄出去了。摎文章丟入郵局青色大郵筒个時節，心肝肚想，雖然亻厓係丟青色个郵筒，毋過希望亻厓个文章出來个成績，做得像紅色个郵筒共樣，「紅紅」光光！
包尾，比賽个成績出來了，亻厓个文章無入選。其實亻厓當失望，因為花了當多時間在寫文章，結果麼个收穫都無，想講自家以後莫參加投稿个比賽了。吂知先生嗄鼓勵亻厓，佢講：「你其實當慶，你个煞猛，亻厓都有看著。雖然講你這擺無打著名，毋過你勇敢踏出第一步，全心投入比賽，有享受著比賽个過程。這兜都會變成你自家最難忘个回憶，這正係最珍貴个！」
「毋係看著希望正愛堅持，係愛堅持下去正看得著希望」。經過先生个鼓勵，亻厓正知得，其實還有當多个比賽在等亻厓去爭取頭名，故所亻厓定著做毋得打卵退，顛倒愛較煞猛，分自家較進步，邁向還較好个自家！
※本文作者邱祥祐為客家系一年級學生，11月29日參加109年度全國語文競賽榮獲客家語演說社會組特優，同班同學林以晴榮獲客家語字音字形社會組特優，客家系全體師生同賀。
左一為邱祥祐同學
左一為林以晴同學
