灶下
【文／湯文豪】
灶下肚个灶頭火當猛，燒樵杈个白煙跈等煙涵飛向天頂消失無蹤。亻厓想，阿婆定著在灶頭前起火、燒樵、炒菜或者暖水？斷真，佢當當在該認真炒菜，就驚一下無注意，火忒猛，會同炒等个菜炒壞忒樣仔，嗄來影響著歸家人个胃口。
還記得，頭擺阿婆在過年个時節，無閒在灶下蒸菜頭粄、煠雞鴨、炆筍乾、煲爌肉；抑係閒時閒節，在灶下炒菜、煮飯、暖水。全全就在這口大灶做事，這做得講係佢展手路个好所在，乜會摎灶下裝到揫揫亼亼，在在就實現了「四頭四尾」，其中一個「灶頭鑊尾」个客家婦女典範。
有一擺，亻厓在灶空前扌帣手阿婆起火，一直起毋得著，阿婆就教亻厓，起火定著愛先同火灰耙耙淨來，再窿一隻草結到灶空肚，扯一張紙仔放到草結下，點著紙仔，恁樣火就會起得著，火自然會猛。阿婆輒常講个做人道理，像係：「人愛靈通，火愛窿空」、「人愛人打落，火愛人燒著」、「大鑊吂滾，細鑊拋拋滾」个客家諺語，到今還記在心。
該央時，阿婆盡煞猛，日日除忒愛煮三餐，還愛準備高低佛仔讀書愛帶飯个飯篼仔，逐日都會去市場買菜。轉來過後，就開始準備暗晡頭愛煮个菜，係有閒，還愛破樵、團草結，好分臨暗頭暖燒水同煮暗餐好用；有成時，還愛去菜園淋水、去田坵綁草仔。故所，輒常同自家搣到當無閒，正經當辛苦。該時𠊎問阿婆，你做麼个做到恁辛苦，佢講：「哪會呢！恁樣對身體正較好」。
係講，堵著落雨天，就愛先傳便樵杈，假使毋罅用，佢就會䟓䟓去河壩脣撿樵，不管係竹笐抑係竹殼，做盡捎捎轉來燒，一息就無打爽。這全全都係為著愛蒸一床好食个粄仔、炒幾項好食个菜、煮一鑊好食个飯，還過暖一鑊燒燒个水，來分歸屋下人食飽同洗身。阿婆日日做到兩頭烏，還愛等屋下人做盡食飽、撿揫同洗好圓身，正有閒坐下來尞。
阿婆一生人，從後生到老，做得講離毋開「灶下」，佢為著屋下个大大細細付出心血，毋識怨嘆過。你知無？灶下該隻無一時閒个背影，永遠係恁得人惜，當分人懷念个。
