鹿寮坑个阿伯姆
【文／李俊彥】
發音人 李俊彥—四縣腔
逐年七、八月个時節，芎林个日頭正烈烈，又無麼个風吹來，試著翕熱翕熱，一儕人恬恬仔企到外背該頭大牛眼樹下尞涼，亻厓心肝肚還緊愐，細細時節阿伯姆个形影。
亻厓從細就同阿公、阿婆共下戴在鹿寮坑，因為細人仔性體較番綻又無時恬，對天光搞到暗昏，係當輒常有个事情，到廳下正坐無兩下半，就會聽著隔壁阿誌哥牽聲緊喊：「還在屋下做麼个呢？遽遽來去山頂尞啊！」過一下仔，大自家儕就會走到禾埕邊脣个穀寮下集合。阿誌哥係鄰舍阿香姨个倈仔，因為厥姊到市區讀書吔，故所，就伸佢一儕在莊下，該時節亻恩兩儕一直係阿伯姆眼中个細猴牯，見擺去山頂項搞嗶噼笐抑係到山腳下遶尞時，阿伯姆一聽著鬧熱尖尖个聲音，就驚怕亻恩俚又愛去偷摘佢種个酸桔仔，定著會䟓䟓行往出看一下，對遠遠仔地方就看著佢面色譴到紅嘟嘟，緊行緊喊：「又係你兩儕細鬼仔！ 該酸桔仔還做毋得食啦！」
阿伯姆既經八十零歲吔，身體還已健，有成時到下晝頭，就會看佢擐等一隻細凳仔，自家坐到山崎脣該頭高柳柳仔个牛眼樹下敨涼，亻厓摎阿誌哥乜會跈等坐厥旁脣，聽佢講「頭擺个故事」。阿伯姆講：「頭過个細人仔無像這下，莊下个生活已艱苦，哪有麼个時節好搞，打早就愛䟘床做事吔！」阿誌哥同𠊎目金金緊聽阿伯姆講古，正兩下仔仰會知亻恩兩儕像目珠分辣椒舞著樣仔，目汁乜緊跌下來，這時阿伯姆皺皮个正手伸入褲袋仔裡背肚，拿等一條舊手巾摎亻厓兜面皮捽燥來，自家在該喃喃喃喃，毋知係唸麼个？ 該央時無詳細聽清楚阿伯姆緊講个話語，單淨聽著一句：「細倈仔毋好恁會噭，驚怕長大會無人愛。」
阿伯姆雖然腳跛跛仔，毋過做事盡煞手，絕對毋會輸分大人儕，打早就蹶䟘起來去田項摘菜，黏時又轉到雞寮飼雞仔，正經當無閒洎杈，到臨暗邊个時節，又看佢對山頂行等來，肩頭㧡等兩大籮過重个菜頭同黃瓠，阿伯姆雖然歲數已大，毋過這兜細事，佢還係㧡得贏。
時間緊走、時代還緊變，阿伯姆到亻厓去讀書个時節，正無幾多年嗄過身口也。逐擺過年過節，亻厓著定會轉到鹿寮坑行行尞尞，這兩年聽阿香姨講：「厥倈仔早就結婚口也，搬到竹東街路項去口也！」
雖然這下，當多人既經無在這位生活吔，毋過該頭牛眼樹下還囥等淰淰个回憶還有一生人个老頭擺。這擺亻厓有聽阿伯姆个話，無噭出來，還係笑咪咪仔。
